[dropcap]И[/dropcap]юньдалул 16-нний Дагъусттаннал БакIчи Владимир Васильевлул ВКС-рал низамрай дунни Оператив штабрал батIаву.

Муний гьуртту хьунни ДР-лул ХIукуматрал Председатель Артем Здунов, ДР-лул БакIчинал ва ХIукуматрал администрациялул Каялувчи Владимир Иванов, ДР-лул Халкьуннал Мажлисрал цалчинма вице-спикер СайгидахIмад АхIмадов, ДР-лул ХIукуматрал Председательнал цалчинма хъиривчу ХIажимахIаммад ХIусайнов, министерстварттал ва идарарттал каялувчитал, районнал ва шагьрурдал бакIчитал, бизнесрал вакилтал.

БатIаврий махъ лахълай, рес­публикалул каялувчинал дакIнийн бувтунни июльданул 15-нния тинмай буклакишиву ссуссукьушивурттавату буккаврил цалчинсса ятIапрайн. Васильевлул баян бунни Роспотребнадзорданул ккаккан дур­сса цинярда тIалавшиннарду бартдигьларча, хъус даххай­сса машлул къатри, ттучанну (400 кв.м. дусса лагрулияр къахъунисса), янна шюшай кIанттурду, химчисткарду, ательерду, хIаммамру ва цаймигу коммунал хIаллихшиннардал кIанттурду (даллакханарду ва цаймигу) тIитIин ихтияр дуллалишиву.
Республикалий 400 кв.м. лагрулул дусса машлул объект­ру сайки 12 азарва бушиву хIисавравун лавсун, Республикалул БакIчинал бувсунни так иш-тагьарданул сан-хIисав дурну, хъиривсса 7-9 кьинилия махъ ца хIукмулийн бучIантIий бушиву.
ДР-лул Роспотребнадзорданул каялувчи Николай Павловлул бувсунни республикалийсса санитар-эпидемиологиялул тагьардания. Мунал тIимунийну, цIанасса ппурттуву сияхIрайн ласлайнма бур коронавирусрал инфекциялул къашавайсса инсантал, амма эпидемиялул бущи ялавай багьну най бур. Махъсса гьантлий сияхIрайн лавсун ур 93 къашавайсса инсан.
Николай Павловлул бувсунни уттигу 16 кIанай тагьар чIурунна душиву. Мунал тIимунийну, уттигу ккаккан дурсса кьяйдарду дуручлан аьркинну бур шаннагу ятIап къуртал хьуннин.