[dropcap]А[/dropcap]зар ххарарххусса тай яла къизгъинми гьантрай жулла республикалий волонтертурал кумаграх къамюхтажсса царагу ара дакъануккива.
Ми аьркинну бия ахIвал-хIал кIюламинначIан дуки-хIачIиялул кьуцуртту биян байнигу, ургала акъа ливчIсса къари-къужрачIан даруртту биян байнигу, хIакинтурал ва медсестрахъал гужру биял къахъанахъисса азарханардайгу.
Залму АьбдурахIманова
[dropcap]М[/dropcap]иллиондалийн бивсса халкь яхъанахъисса жула хъун шагьрулул «Анаварсса кумаграй» тIурча, волонтертал бувагу бакъа пайда бакъая. Гьантлун азаруннийн дирсса телефоннавухсса оьвчавуртту дия, тIар, апрель къуртал хьуну, май барз байбихьлахьисса гьантрай. Къааьркин хьуну бикIанссияв шикку чулухасса кумаг?
«Ттигу, дакIницIух ливчIсса кунма, хъамакъабитай: «Лажиннича, на бивчIан мабитари! Миннатри, на ххассал банмур бувара!» — тIий, аьсив буклай бивкIсса оьрмулул 55 шинавусса хъамитайпа. Температурагу 40-ннийн лархъун, сатурация (оьттувусса кислород) дия 58-ннин дагьну», — тIий буслай бур ттухь тай гьантрай волонтерну «Анаварсса кумаграй» зий бивкIсса Сугуева Сюзанна МахIаммадрасуллул душ.
Ва ванил оьрмулуву утти кIилчин волонтершиву дан багьсса иш хъанай бур. Волонтернал ххуллийхсса цалчинсса цила шаттирду Сюзаннал лавсун бур цила Ватандалийн, ЦIуссалаккуйн, Чачаннал чулуха къачагътурал-террористътурал кьюкьри дурхсса 1999 шиналва. Та дяъвилул чIумал лархьхьусса дарсругу утти ванин аьркин хьуну дур цIанасса азарданущалсса дяъвилийгу.
Сюзанна, ЦIуссалакрал школагу къуртал бувну, 1996 шинал дуклан бувххун бур
МахIачкъалаливсса Б. Мурадовал цIанийсса Культуралул ва магьирлугърал колледжравун. Вагу къуртал бувну, музыкалул дарсру дихьлай бивкIун бур Бархъаллал школалий. Ва шяраву цила оьрмулул дусгу лявкъуну, ташулул хьуну бур. Махъсса шиннардий вайннал кулпат МахIачкъалалив бивзун бур.
Азар ппив хъанай, хIакинтуран ца яла кумаг аьркинсса гьантрай, Сюзанна, цила хушрай лавгун, рязий хьуну бур, кулпатраягу ят бувцун, хьхьу-кьини къакуну, цищава шайсса кумаг буллан. Гьантлун 28 къашайшалачIан буккайсса чIунну диркIун дур вайннал ца бригадалул. Сюзаннал бусаврийну, цIимигу, кумаггу чIа тIисса къашайшалтрал ялун буххайхту, цивппа бувххун, багьтIатI хьушивугу хъамабивтун, гай ххассал банмуних луглай, утту бишин бансса азарханардайн оьвтIий булукьайсса бивкIун бур.
Сюзаннайн тапшур увну ивкIун ур 10 студент-волонтер. Вай бивкIун бур медициналул колледжраву дуклакисса оьрчI-душру. Азар лагь хьунугу, цIанагу ва даву кьакъариртун, цащава бан шайсса кумаг буллай бусса бур вай, ца команда хьуну.
Барчаллагь, Сюзаннай, вин! Медициналул зузалагу бакъанма, му гьивугу вила мукьав лархъун, виричу кунма, хъачI хъачIну хIакинтуращал ца кьюкьлуву бавцIуну бушиврухлу.
