[dropcap]Щ[/dropcap]алагу дунияллийх ппив хьусса коронавирусрал инфекциялул ва муницIун бавхIуну соцсетирдаву ппив хьусса личIи-личIисса хавардал ва видеордал инсантал аьраттал буккан бувну бур.

Инсантурал психика цакуццуйсса дакъар, баллалимур, бусласимур гьарнал нярайн личIи-личIину асар хъанай бур. Ва захIматсса тагьарданий инсантуран чара бакъа аьркинни психологнал кумаг, мюнпатсса маслихIат.

---

Андриана Аьбдуллаева
— Цукунсса маслихIат бавияв ина цIанасса тагьарданий жула инсантуран? – куну цIувххуссия на Н.И.Пироговлул цIанийсса РНИМУ-лул (Российский национальный исследовательский медицинский университет) кафедралул доцент, психологиялул элмурдал кандидат, Москавливсса «Да­гъусттан» культуралул центрданул медициналул зузалтрал ассоциациялул каялувчи Гулизар Башанаевахь. КутIану бишлай буру ванил увкумур.

— Цалчин, на хъунмасса барчаллагь учин ччай бура ттунма ххирасса «Илчи» кказитрал редакциялухь, нава дакIнин багьсса, ва цIанасса тагьарданул хIакъираву ттухьва цIухху-бусу бувсса.
КIилчин, хIакьинусса тагьарданул хIакъираву. ЦIана, мяйжаннугу, бувкIун бур инсантуравун ццах бутлатисса замана. Инсан нигьа увсун ур кIул бакъамуния, нигьа увсун ур бивкIулия. МуницIун бавхIусса бур инсаннавусса гьарица асар. Цащава цала оьрму хха­ссал бан цичIав бан къахьунссар тIисса, цала бюхъу-бажарданийн мукIруну акъасса инсаннавунни хьхьичIра-хьхьичI дагьлагьи­сса ццахханну. Мукунсса пикрирду бакъасса инсан бигьану уккай­ссар нигьачIисса тагьарданува. ЦукунчIав къабучIиссар ццах фобиялийн, яни байгьин къашай­сса ццахлийн, кIурабаен битан. ЦIанасса дунияллий инсан мудангу хьунаакьлай ур нигьачIаву дусса иширттащал, стрессращал, мигу бувхIуну, гихунмайгу оьрму бутлай ур. На учин ччай бакъара нигьачIаврихгу къулагъас къадурну, бакI гьаз дурну, хьхьичIун ххявххун ачин аьркинссар куну.

Гьич, му кьянкьашиву дакъар, му вила оьрмулул, цIуллу-сагъшиврул чулухуннайсса баччибакъашивур, авдалшивур. Амма ццаххандарал мугьалттухьхьун къаириянсса чаран лякъин аьркинссар. НигьачIавринсса яла къулаймур чарангу аькьлу-кIулшилий, ссавурданий сукку тIутIавур. Инсаннал оьрмулуву нигьачIаву мудангу дуссар. Ца яла ларгукун, цамур дучIантIиссар. Мунияту инсаннан аьркинссар, нигьачIисса тагьарданий цала цува увгьуну, гьарицагу иширава уккансса чаран бушиврийн мукIруну, ццаххандарал гьанавиххи хьун къаавцIуну сукку тIун. Нигьираяр ялтту уккан хъунмасса бияла инсаннахь цахьва буссар.
Дунияллий яла гуж бумур асар – нигьри. Ялун ттуккун, укунмагу ццаххандарал бувгьусса инсантурахь СМИ-дал бакъацIавай бусласисса хъиннура дакI гьулусан дуллалисса, щавуйн цIу бичлачисса хавардугу. Элмулул исват бувну бур инсаннаву нигь аькьлу-кIулшилияр ялтту дуккайшиву. Яла-яла мунил ясир айшиву цала бюхъу-хъитлий къамукIрусса инсан.

КьатIув къабувккун, хъуннасса чIумуй шаппа щябикIаву – мугу аькьлу-кIулшилунсса ва цIуллу-сагъшиврунсса стрессри. БучIантIимур цукунсса бикIавивав тIисса нигьал гъансса инсантурал дянивсса арардугума щачин дайссар. Цаннал цаннайн­сса аьй-бювкьурду чIяву шайссар. ХьхьичIва кулпатраву бивкIсса масъалартту утти, ичIуваминнал ссавур духларгун, хъиннува ялун личин бюхъайссар. ЧIяву шай­ссар кувннан кув къабувчIлачIисса кIанттурду, къалмакъаллу. Изоляция – гава дуснакьрал журалий­сса кунмасса оьрму бур.

Ва тагьарданий инсаннан аьркинссар, оькки­сса пикрирдугу бакIрава буккан бувну, цала оьрму баххана бан­сса, укунсса шартIирдайгу цувагу, цаламигу бялахъан бансса чаран ля­къин. Дувара кьинилул дянив зува зунтIимунил расписание, изайсса, уттуишайсса, дукра дукайсса, гимнастика дайсса чIун. Ккаккан дурмур щаллу дан хIарачат бувара. Зунма цIусса ци-бунугу кIул бан­сса мурад бишияра хьхьичI. Ццах бутлатимуния, масала, коронавирусрая, бусласисса передачартту бюхъавай ххал мадару. Уттинин бавмунияр ххишаласса зун цичIав къабаянтIиссар, хъиннува ццах бутарча бакъа. Муна мукунсса информациялул дурсса стресс дур цIана чIявуминнаву.

Ккалаккияра луттирду, ххал дувара бялахъансса передачартту, кинорду, вичIи дишияра зунма ххирасса музыкалух. Дувара дахханасса дукрарду. Ихтилат бувара дакI данмур, тIааьнмур бусайсса инсаннащал. Миннул буккан бантIиссару зу ццаххандарал дунияллува. ДакIнийн бутияра, ци хияллу бивкIссарив зула цIанасса чIун дучIаннин. Байбишияра ми бартбигьлай. Давурттайн заназисса чIумал зу бю­хъайссару, ичIаллил давурттан, кулпатран, луттирду буккин, щащан, дуру­ххан чIун къаличIлай, рязину бакъа бивкIун бикIан. Утти зуща бюхълай бур вай иширттан ххишаласса чIун хас дан.

Гьарица затрал ахир дикIайссар, дучIантIиссар ахир цIанасса иширттангу. Оьрмулуву ссаву-бунугу тIайлабацIу къашаврил тахсир зуйва ккаклай, дуниял ялун дагьсса кунма, зула зува кьуцIу мабулларди. Гьарнал, яла бахтти буну чIалачIиналгума, оьрмулувугу бикIайссар бахтти къавхьусса ишру. Мабукларду аьраттал, макьукьларду ххуймунинсса вихшала. Ссавур дувара.

Низам дуручлачисса органнал зузалтращал ччалан аьркиншиву дакъассар, зулагу, гайнналгу ня зия дуллай. Гай, амру бувну, жула мюхчаншиврул цIанийри зузисса. ДакIний битияра, дайгьин къа­хъанахъисса нигьиралли инсан аьра­ттал уккан уллалисса. МабацIари нигь аькьлу-кIулшилияр ялтту ду­ккан. Лахьхьияра нигь-ццахлияр ххув хьун. Ттула нава къаувгьуну пайда бакъа­ссар, ттунмагу, цайминнангу кумаг бан хIарачат банна ва захIматсса тагьарданий куну учияра зухьва зува. Жула бияла хъунмассар. Хъама маритари хIасул хьусса тагьарданий жуйра­сса жаваблувшинна. Му чIумал жущава бюхъантIиссар, ццахлияргу ххув хьуну, жунмагу, цайминнангу кумаг бан.
Гьарнан чIа тIий бура цIуллу­шиву ва ссавур.