«Ва азар гьарцаннайн личIи-личIину дияй»

Гъумуксса азарханалий медсестрану зузисса
ДГМУ-лул 4-мур курсирал студентка,
Ххутрал шяравасса Камилла Гъазиева

[dropcap]В[/dropcap]ай махъсса зурдардий, хIакинтуран кумаг буллай, цалла цIуллу-сагъшиврунсса нигьачIаврия хIучI къакуну, гьунттий цивппа уртакьну зунтIиминнащал хъачIрай-хъачI дирхьуну зий бур медициналул вузирдал студентъталгу.

Агьалинал оьрму ла-ялун бувсса вирусрал лагма хIасул хьусса тагьарданул хъуннасса хъар цайнна ларсун най бур Дагъусттаннал паччахIлугърал медициналул университетрал студентътал.


Бадрижамал Аьлиева
ДГМУ-лул шама студент зий ур цIанасса ппурттуву Лакрал райондалул азарханалий Гъумук. Миннавасса ца – Ххутрал шяравасса Гъазиева Камилла Гъазил душ бур.

Камилла дуклай бур Да­гъусттаннал медициналул университетрал 4-мур курсирай. Гъумук азарханалийва яхъанай, «ятIул зоналий» медсестрану зий, азарханалия чунчIавсса буххаву-буккаву дакъа Камиллал барз ххишалагур.
— Нава медициналул вузрал студентгу бунавхьур, ттуйра­сса жаваблувшиннагу дурчIлай, ттулва буржгу чIалай, ччан бивкIунни Соvid-19-ращалсса талатавриву ттулвамур бутIагу бишин. На язигу бугьав ттула аьзизсса райондалул азархана. Дуниял ххассал дуваншиврул цал цалла ватан ххассал дуван аьркинссар.

[dropcap]Н[/dropcap]а зий бура инфекциялул отделениялийн кIура баен бувсса хирургиялул отделениялий. Шиву бур 30 къашайшалансса тах, ми цинявппагу бувцIуну бур. Ттул шикку медсестрану барз ххишалагу хьунни. ХIакьинусса кьини ттуща кьянкьану учин хьунссар Лакрал райондалул хъунмур азархана аьркинсса цимурцаннул лащу-щаллуну бур куну – медициналул зузалтрансса мюхчаншиврул янналулгу, аппаратиртталгу, кислородрал концентратиртталгу, чара бакъа аьркинсса препаратиртталгу.

Инфекциялул азардал
Республикалул
центрданийсса къашайшалт хъин буллай медсестрану зузисса ДГМУ-лул 5-мур
курсирал студентка,
Шахьуйннал шяравасса
Аида Аьлиева.

Гьантлун ца-кIия къашайшала итаавкьусса чIуннугу шай, амма най бунава миннал кIанай цайми уттубишайссар. Уттинин ца тах бачIва ливчIсса кьини къархьунни. Жунма бакIрайва щаквагу багьлай бивкIун ба­къар, цуксса бунияласса, цуксса нигьачIисса азар диркIссарив ва коронавирусрал инфекция. Умуд бур гихуннай щаллара инсаниятрал цалла цIуллу-сагъшиврухгу, лагма-ялтту хъанахъимунихгу бунияласса бургаву дикIанссар тIисса.

[dropcap]В[/dropcap]а азар гьарцагу къашайшалайн личIи-личIину дияй, жу шаймур буллай буру миннал къюву хьхьара дуван, ми шай­ссаксса ччяни ччаннай бацIан буван. Давриву яла захIматмурдив бур инжитну къашавайсса, жущава кумаг буван къашайсса къашайшалтрал ккухIлахIисса аьзаврттах буруглан, — буслай бур Камилла.
Камиллал ппу Гъази ур МВД-лул пенсионер, 20 шинал мутталий личIи-личIисса къуллугъирттай зий бувсса захIматрахлу лайкь хьуну ур «Мужествалул» ордендалун ва цаймигу наградарттан, нину Замира – «Паскуччи» кондитер цехрал производствалул хъунмур, технолог.

ДГМУ-лул 5-мур курсирал студентка, Шахьуйннал шярава­сса Аьлиева Аида Кирамуттиннул душ зий бур инфекциялул азардал Республикалул центрданий медсестрану.
— Жу дуллай бивкIру жура муниннингу дуллай бивкIсса даву, амма захIматшиву дия ряхрахъул ссятурдий буруччайсса костюмирттаву бушиврул, дежурствалийн бувкIун, 6 ссятрайсса чIумул дянив жуща бюхълай бакъая щинал ххуввагу учин, ти-шинмай хьун.

[dropcap]Э[/dropcap]пидемиялул дайдихьулийва хъинну чIявусса медработниктурайн цайнна азар лархъун, зунми биял къахъанай, жул вузравасса хъинну чIявусса студентътал цала хушрай бувкIуна республикалул медициналул клиникарттай зун. Республикалул центрданий ттущал буссия миннавасса чIявуми, жу, цивппа хIакинтал кунма, ялапар хъанай бивкIру гостиницалий, гьарца кьини жу даврийнгу, махъунмай гостиницалийнгу биян байвав автобусрай. Жуща я шаппай зана хьун, я щищалкIуй ккаккан бюхълай бакъая. БакIрайва 6 ссятрай зий, 12 ссятрай бигьалаглай бикIайссияв, яла, цала хушрай кумагран букIлакIисса студентътал ялу-ялун чIяву хъанан бивкIукун, суткалий 6 ссятрай зун бивкIру.

[dropcap]Ш[/dropcap]иккува кIицI лаган, вай аварасса гьантрай хIакинтуран кумагран бувксса студентътурал чIарав хъинну авцIунни жул ДГМУ-лул ректор Маммаев Сулайман Нураттиннул арс ва мунацIунсса цаймигу. Практикалий буссаксса хIаллай ттун бувчIунни ца агьамсса зат – къашайшала хъин авриву хъунмасса кIану бугьайшиву медперсоналданул цIимилийсса дакIнива увку­сса хъинсса мукъурттил, иминну бувсса ихтилатрал. Буруччай костюмирттаву, маскардаву, рес­пиратордаву бунугу, къашайшалтран жул лажинтру чIалай дакъанугу, миннан кIул шайва жу цачIанма палаталувун ци настроениялий бувхссарив, щуркIал шайва жу цахва буруглагисса куц. Цал-цал жул чулухасса ца-кIива махъ, ца-кIира калима гьа шайва миннал чурххал хIал ххуй хьуншиврул. Цуксса кьурчIинугу, пандемиялул чIумал цалва гъан-маччанацIа хьусса чIявусса къашайшалт хьунни, щаллусса кулпатрува азарханалийн багьну, кулпатравасса цания ца ивкIушиву махъминнахь бусансса куц, миннал къумашиврул къюву лагь дувансса махъру къаляхълахъисса ишру, — буслай бур Аида.
Аидал ппу Кирамуттин зий ур «Дагэнерголий» инженерну, нину Асият – шаппаллилсса буллай.

Сеченовлул цIанийсса Медициналул
Цалчинсса академиялул 6-мур курсирал студент,
вирусрал бувгьуми хъин буллай, Москав шагьрулул
24-мур азарханалий «ятIул зоналий» медбратну зузисса, ГьунчIукьатIрал шяравасса ЯхIия АхIмадов ­

Москавливсса Сеченовлул цIанийсса Медициналул Цалчинсса академиялул 6-мур курсирал студент, ГьунчIукьатIрал шяравасса АхIмадов ЯхIия Камиллул арс вирусрал бувгьуминнан кумаг буллай ур Москав шагьрулул 24-мур азарханалул «ятIул зоналий» медбратну.
Суткалий 12 ссятрай ччаннай авцIуну, инжитсса къашайшалтралсса буллай, ЯхIиянал цимигу шинал стаж бусса хIакинтуращал цану зий хъунмасса захIмат бивхьуну бур, «Космос» отельданий ялапаргу хъанай, нину-ппу цимигу нюжмардий ххал къавхьуну.
Увну ур ЯхIия 1996-ку шинал МахIачкъалалив Камиллул ва Камилал кулпатраву. ЯхIиянан 4 шин шавайсса чIумал, вайннал кулпат бивзун бур Москавлив. ЯхIиянал къуртал бувну бур Мос­кав шагьрулул № 2005 школа, увххун ур Сеченовлул цIанийсса Медициналул Цалчинсса академиялувун. ОьрчIния шинайва спортрахун агьсса ЯхIия оьр­мулул 14 шинаву хьуну ур киокусинкай каратэлул Москавуллал ва областьрал чемпион, ларсун дур спортраву ва дуккавриву къачансса наградартту, бахшишру.
— Ца сменалий 60 инсаннан­сса жул отделениелийн увцуну бувкIуна 60 инсан – хъунмурчIин оьрмулул бугьарасса. Ванияр цаппарасса нюжмардал хьхьичI инжитсса къашайшалт чIявусса бия, дяхтта бувцуну бувкIун, инжитну къашавайминнава хьхьувайнин 3-5 инсан ивчIайва. Ци-бухьурчагу, инжитну къашавайми ялу-ялун чан хьунни, — буслай ур ЯхIия.
ЦIанасса чIумал ЯхIия хIадур хъанай ур паччахIлугърал экзамендалийн (кказитрал ва номер букканнин, ЯхIиянал ва Медакадемиялувусса махъва-махъсса сессия марцIсса ххювардайну буллунни), мугу дуллуну, хIакинну-хирургну зунсса ниятрай ур.
ЯхIиянал ппу Камил ва нину Камила бур ишбажаранчитал. Шиккува кIицI лаган, Камиллул ниттирссур Дагъусттаннал Ссихьрал театрданул директор Аминат ЯхIияевна.
ЧIа учин ччива жулва ххаллилсса жагьилтуран оьрмулуву ва давриву тIайлабацIуртту, хьхьичIуннайшивуртту. Ванияр тихунмай къабагьаннав зун баян къабув дяъвилий кIул акъа душманнащал талан. Паракьатсса дунияллий, паракьатну зула-зула давурттай чIярусса шиннардий зунсса каши-кьудрат дулуннав зухьхьун.