[dropcap]М[/dropcap]едициналул зузалал кьинилул хьунийн Мариян Илиясовал цIанийсса ихIсандалул фондрал Москавливсса филиалданущал цачIуну сакин дунни «Барчаллагь, хIакин» тIисса акция.
Арцуйнусса бахшишругу, барчаллагьрал открыткарттугу дуллунни коронавирус дусса къашайшалт хъин буллалисса Лакрал райондалул больницалул хIакинтуран, медсестрахъан ва санитартуран.
Зулайхат Тахакьаева
Ххю-ххюазарда къуруш ва барчаллагьрал открыткарду дуллунни хьхьу-кьини дакъа коронавирусращал талатисса 25 медициналул зузалан.
— Жущава лахълай лахъан къахьунтIиссар, цала оьрмулунсса хъуннасса нигьачIаврих къабурувгун, ва лавмартсса цIуцIаврищал талай, жула хIакинтурал щаллу бувсса захIматрал бурж, — тIий бур фондрал хъунмур Гульшан Хасаева. — ЦIубутIуй фондран пикри буссия азарханалун дарурттайнусса кумаг бувансса.
Азарханалул хъунама хIакин АьбдурахIин Дибировлул азархана даруртталгу, гьарца аьркинмунилгу дузалну буссар увкукун, пикри хьуна хIакинтурахь барчаллагь учин. Хъунмасса барчаллагь тIий буру цила чIумал азархана коронавирусрал инфекциялущал талан хIадур бувсса АьбдурахIин Дибировлухьгу. Мукунма барчаллагь тIий буру райондалул бакIчи Юсуп МахIаммадовлухь, гьарца идарарттай коронавирусрал инфекция ппив хьун къаритансса чаранну цила чIумал лякъаврихлу.
