ГЪИЯСЛУЛ АРС ХIАЖИЕВ ЗАГЬИДИ

[dropcap]И[/dropcap]юньдалул 4-нний хар-хавар бакъасса бивкIулул бяличIан бунни ГьунчIукьатIрал шяравасса ХIажиев Загьиди Гъияслул арснал оьрму. Загьиди оьрмулул дахьа 63 шинавунъя увхсса, бувассая ванал оьрмулухсса мякь лиххан.
Увну ур Загьиди 1957-ку шинал ГьунчIукьатIрал шяраву ХIа­жиев Гъияслул ва Саниятлул кулпатраву. Комбайнерну зузисса буттал кумагчину зий, Загьиди чIивинияцIакула захIмат ххирану, захIматкашнал хIурмат буну хъуна хьуну ур. Ванал гьурттушинна дакъа «ЯтIул Ттугъ» колхозраву царагу даву къашайсса диркIссар.
Школалий 8 классгу къуртал бувну, Загьидинал гихуннайсса дуккаву дурну дур Каспийскаллал 6-мур строительный училищалуву. Ватандалул хьхьичIсса цалва бурж лахълай, 1977-1979-ку шиннардий къуллугъ буллай ивкIун ур Совет аьралуннаву, Волгог­радрай, Качиннал Лаваймур военно-летный училищалуву.
Аьрая зана хьуну махъ зий ивкIун ур Каспийскалий «Дагдизель» заводрай. Гихунай Загьиди зий икIайссия къатри баврил давурттай личIи-личIисса кIанттурдай: Дарбантуллал домостроительный комбинатрал Каспийскалийсса строительный компаниялий электросварщикну, Липецкаллал, Саратовуллал облас­тирдал ва Ставрополлал шагьрулул идарарттай, МахIачкъалалив – Ленинккант поселокрайсса школа буллали­сса давурттай.
Загьиди ия дакI хъинсса, инсаннан кумагран учIан хIадурсса чув, даврил лавайсса даражалул усттар, кIулминнаву ва архIал зузиминнаву бусрав бусса дус ва уртакь. Ванаясса аьпа ва кIулну ивкIминнал дакIурдиву мудангу личIантIиссар.
Загьиди аьпалул шаврил кьур­чIишиву кIидачIлай, жижара буллай буру ванал кулпатрахь Асиятлухь, шанмагу душнихь, уссурваврахь, ссихь, ссурахъаврахь, махъсса гъан-маччанахь. Ванал бунагьирттал аьпа буваннав, рухI хъинний, чурх куклуний бишиннав.
ГьунчIукьатIрал жямат

Загьидинал аьпалун

Бивтсса ккуллалул куна,
Ина унин агьунна,
Хьумур цирив кIул хьуннин,
Жуяту личIи хьунна.

Жул чIаххув оьрчI, Загьидий,
ОьрчIшиву цачIу ларгсса,
Ина акъасса хавар
ДакIнийн хъинну кьувтIунни.

Ца-цаних дичлачисса
Луттирал чIапIив кунна,
ОьрчIшиврул гай лахIзарду
Ца-цаних хьхьичI бавцIунни.

Ина акъассар учин
ДакIнища хъанай бакъар,
ИвкIунтIий ина мудан,
Иш багьний, щарнил чIарав.

ХъатIивгу вин ххирая,
Кьини дуркмагу кIула,
Шяраву ци хьурчагу,
ХьхьичI микку ина шайвав.

Дада хьхьичIун дурккунав,
Зума тIий, ча увкра тIий:
«Ччяссияхха, арс, ттигу,
Жущал архIал чул бан», — тIий.

Ягу мямма увкIунав,
Чурттуя ликкан уван,
Шагьрулияту бувкIсса
Хъунма ссайгъат кьамул бан.

Тти шанашу, Загьиди,
Абад лавкьу къатлуву,
Вин аьрщи памма хьуннав,
Гьав нурданул дуцIиннав.
АхIмадова ХIурия

---

ХIусманнул арс Ссаламов Илияс

Ва нюжмардий, щалва агьлу-авладгу банд лаган бувну, хар-хавар бакъа дунияллия лавгунни 1-мур ЦIувкIратусса, бюрни куна оьвхъусса жагьил, ХIусманнул арс Ссаламов Илияс.

Увссар Илияс 1968 шинал ЦIувкIрав. Аьралий бурж би­ттур бувссар Чехословакиянаву. Строительный техникумгу був­ккуну, зий ивкIссар ЧIиркIайннал ГЭС-райгу, Ирганайннал ГЭС-райгу. Зий уссия Новостройрал трестрал строительствалул давурттайгу. Илияс строительнал даву ххуйну кIулсса, муххал, тIаннул, чарил – ччимур журалул даву магьирну дувайсса усттар уссия. ЗахIмат ххирасса, зий акъацIайсса, дуллалисса давугу заллухъру рязи буванну дагьайкун дувайсса Илияс жяматрал, лагма-ялттуминнал дянив тIалавну ва бусравну уссия. ДакI-аьмал хъинсса, инсаннал иттав пиш-пиш тIий акъа къаургайсса, хасиятрал хIалимсса инсан уссия. АрхIал дуклай бивкIцириннан, дустуран, гьалмахтуран, шяраваллил жяматран ва хъинну ххирассия.
ХIусманхъал Илияс дунияллия лагаврил кьурчIишиву кIидачIлай, жижара буллай буру ванал кулпатрахь Умахь, душваврахь, арснахь, уссихь Ирвагьиннухь, ссурваврахь Сакинатлухь, Ларисахь, Светланахь, ниттирссурваврахь Аьишатлухь ва Маржанатлухь, ссурахъаврахь, цинявгу гъан-маччанахь, ва хъинну ххирасса щалвагу ля­хъиндалухь. Илияслун къабуллумур оьрмулул бутIа ванал душвавран, арснан ххибувну ля­къиннав, Аллагь рязиминнавух алжаннуву кIану буваннав, гьаттай нур дизаннав!
1-мур ЦIувкIуллал жямат

---

Загьрани цинявннан ххирасса
бивкIун бур

Барчаллагь учин ччай бура ттулагу, ттула циняв уссур-ссуннал чулухагу ва захIматсса, цачIу щябивкIун кьурчIишиву кIидачIин къабюхъайсса чIумал, чIунгу ляркъуну, цавайннал телефондалувух, цавайнналгу «Илчи» кказитрайхчин увкусса, кьурчIишиву кIидачIлачIисса дакIнихтунусса мукъурттихлу.
Загьрани, ттун кунма, цинявннангу ваксса ххира­сса бивкIшиву къакIулссия. Мяйжаннугу, оькъавку­сса, жижара къабувсса инсан къа­ливчI­хьунссар. Барчаллагь зун хъунмасса.
Зул къатравун ххарисса, шадсса бакъа хавар къабаяннав, я Аллагь.
ДакIнихтунусса барчаллагьрал махъру учин ччива ттула чIарав гай яла захIматми гьантрай бивкIсса чIаххуврайсса ГьунчIукьатIрал жяматрахь. Уссур­вал, ссурвал, ттун зу бувмур гьич хъамакъабитанссар!
Барчаллагь жула КIямашрал жяматрайн, кьурчIисса гьантрай чIарав бавцIусса.
На зуха дурцири дуаьрдугу Заннан кьамулсса хьуннав!

Нагу Загьранил
уссил Загьидинал кулпат ПатIимат