[dropcap]К[/dropcap]оронавирусрал инфекция сукку хьусса чIумал, цалчинсса гьантрая хIакьинусса кьининин хьхьичI ххуттай, «ятIул зоналий», зий бивкIсса хIакинтуравасса ца ур Ккурккуллал шяравасса Аьлил арс Шагьумилав Сулаймановгу.
Андриана Аьбдуллаева
[dropcap]Ш[/dropcap]агьумилав увну ур 1984-ку шинал. Дагъусттаннал медициналул университетгу къуртал бувну, зун ивкIун ур Н. Кураевлул цIанийсса оьрчIал азарханалий. Ца-кIира шинава увкIун ур Новостройрал азарханалий (НРБ 1) зун. ЦIанасса чIумалгу шикку зий ур. Гьарица ххуллункьинирив Шагьумилав лагайссар Гъумукун, Лакрал райондалул хъунмур азарханалий къашайшалт кьамул бан, кIикку пишакар акъашиврийн бувну.
Шагьумилав ур хIакин-рентгенолог, оьрчIал хирург. Лавайсса даражалул пишакар хIисаврай ва бусравну ур цува зузисса коллективраву, ххирану ур къашайшалтран. Шагьумилавл оьрчIал хIакиннал пиша язи бувгьусса чIумал, ва кIулминнал му мукун бикIан аьркинсса зат кунма кьамул бувна, цанчирча Шагьумилавн хъинну ххирар мюрщи оьрчIру. Ва шяравун увкIсса чIумал миннан байран дикIайссар. Шагьумилавл цIани-цIай ххуй бизлай, га цIана ванал лагма лагайссар. Ва ур ляличIинува дакI хъинсса, цIими ххисса, цила икIайкунсса оьрчIал хIакин.
Укун буслай бур чIивисса оьрчIащал ШагьумилавчIан багьсса ТIюхчаратусса Тамара.
— ЧIивисса, 9 шинавусса арснал обследование дуллай, на личIи-личIисса клиникардайн бивра. Гьутрурду ххал буллалисса хIакинтурал гьарзат ххуйну дур куну тIайла буккайвав. Новостройрал азарханалий ШагьумилавчIагу бувссия рентген. Ванал, гьутрурдай саргъундакъашиву душивугу бувсун, хъирив букку куна. КIилчингу шагьрулул клиникарттайх бувкра, цIунилгу хIакинтурал паракьат бувну гьан бувра.
Паракьат хьунссияв нагу ванал бивтссания: «Ттун гьутрурдал сурат ххуй дизлай дакъар, оьрчIал хъирив букку», — тIий, ялув ливккуна. ХIасил, дурухлу ляркъуну, Москавлив операция бувссар. На дакIнихтуну барчаллагьрай бура ванайн. Ва цала тIутIимуний кьянкьану авцIуну къаивкIссания, бюхъайвав на чIал хьунгу. Му оьрчIая чичин дакIнин багьсса вингу барчаллагь, лайкьссар, — тIий бур Тамара.
Жула учайссар, мархраха лархьхьусса ккижгу дикIайссар куну. Шагьумилавл буттал ппу (ванал цIар хIакиннангу дуллусса) райондалий сий дусса адамина ивкIссар. ЧIярусса шиннардий Ккурккуллал дянивмур даражалул школалул завучну икIайссия. УчительтурачIагу, дуклаки оьрчIачIагу ванал хIурмат хъунмасса бикIайссия.
Сулаймановхъал агьлу-авладрай лайкьсса хIакинтал чIявусса буссар. Ванал буттауссу Сулайман Дагъусттаннал медициналул университетрал госпитальный терапиялул кафедралул доцентри. Ва хIакин-терапевт, пульмонолог ур, медициналул элмурдал кандидат. Буттарссу Анисат Лакрал райондалул азарханалул участокрайсса оьрчIал медициналул сестра бур. ЧIявуми ссурахъалгу, Москавуллал ва МахIачкъалаллал азарханардай хIакинталну зий, ххуйсса пишакартуран ккаллину бур. Вайннал лайкьну дуручлай бур аьлимтурал шяравалу тIий цIа ларгсса Ккурккуллал шяраваллил цIа. Чув бухьурчагу, ябаннав Аллагьнал.
