«Оьрус учительтал Дагъусттаннай» тIисса лу бувккунни

[dropcap]В[/dropcap]ай гьантрай дунияллийн бувккунни «Оьрус учительтал Да­гъусттаннай» тIисса луттирал кIилчинмур том. Ва личIи-личIисса шиннардий

Дагъусттаннай зий бивкIсса учительтурая бусласисса лу бур, ванил авторгу Дагъусттаннай ххуйну кIулсса жяматийсса ишккакку, ниттихъал ва оьрчIал ихтиярду дуручлачисса жяматийсса «Содружество» тIисса ккурандалул хъунмур ПатIимат Геличова бур.


ПатIимат Рамазанова
Ва цуппа Гергебиллал райондалиясса бур. Дагъусттаннал медициналул училищагу къуртал бувну, ласнащал, КГБ-лул хIаписарнащал, мукьра шинай Авгъанисттаннай бивкIун бур щавурду дирсса жулва саллатIналсса буллай. Тиха бучIайхту Дагъусттаннал университетрал филологиялул факультетгу къуртал бувну, личIи- личIисса давурттай зий бивкIун бур.

Ва бур Ниттихъал ва оьрчIал ихтиярду дуруччайсса жяматийсса советрал вакилгу, Дяъвилул ветерантурал жяматийсса комитетрал членгу, цайми ккураннал вакилгу. Мудангу республикалий хъанахъисса иширттавух чялишну хIала буххайсса, ихIсандалул, ка-кумаграл давурттал сиптачи шайсса ПатIимат Муртазялиевнал республикалул агьалинан бахшишри дагъусттаннал оьрчIан кIулшивуртту дуллай бивкIсса оьрус учительтураясса хъунмасса томгу. Ххюра шин дурссар ПатIиматлул ва луттираха зий, тамансса архиврду ххилтIу бувссар, диялсса материал дартIссар. Ванил луттиран кьимат бишлай, оьрус учительтураясса энциклопедия тIий бур.

«Ва лу, дагъусттаннал агьалинан цанма кIулмур лахьхьин буллай, республикалул шагьрурдай ва зунттал щархъаву зий бивкIсса оьруснал интеллигенциянахьсса барчаллагь хIисаврайсса давури. ХIакьинусса кьинигума бугьарасса инсантуран дакIний бур цанма оьрус мазгу, литературагу лахьхьин дуллай бивкIсса учительтал. Миннаяту ххуйсса бакъа учинсса бакъар. Барчаллагьрай бура материал датIин ттунма кумаг бувминнахьгу», — тIий бур ПатIимат.
На дакIнихтуну барча буллай бура ттулва ххаллилсса дус ПатIимат Геличова лажин кIялану агьалинал хьхьичIун буккан бувсса ва луттиращал.
Ттун кIулли ПатIиматлул уку-укунсса цаймигу проектру бартдигьинсса мурад бушиву. ТIайлабацIу баннав!