Дарбантливсса медцентр зунтIиссар ва зурул ахирданий

[dropcap]Д[/dropcap]арбант шагьрулул мэр Хизри Абакаров ивунни Аьрасатнал Мюхчаншиву дуруччай министерствалул касмукартурал госпиталь буллалисса кIанттайн.

Строительствалул даврил бущи-тагьар ххал дигьин ялтту увксса мэрнал бувсунни цува давуртту сантирай ва лябукку буну най душиврия ххарину ушиву, июнь зурул ахирданий цIусса азархана зий байбишинтIишиву.


П. Рамазанова
Ванал бувсмунийн бувну, цIанакул строительтал вив­сса давурттив дуллай зий булувкьуну бусса бур. АрхIала, къир бувтIуну, бакьин буллай бур госпитальданучIансса ххуллугу. Аьрали строительтуран кумаг буллай бур кIанттул идарарттугу: «Ростелеком» цIусса азарханалул къатрачIан интернет дуцлай бур, «Альфа-строй» тIурчарив – ттукI буцлай. Хизри Абакаровлул кIицI лавгунни ва госпитальданул ца хьхьичIуншиву – хьхьирил зуманивсса бушавугу душиву, къашайшалтран хаснува хьхьирил гьава малхIанну шайшиву. Хьхьиривун азарханалия чапалсса щин къанансса чаранналулссагу уттива бувну бур: канализациялул щин, марцI дурну дакъасса, хьхьирийн къаэкьинан ритайсса. Ва чарангу хьхьирил зуманицIухсса цинявппа идарарттал хIисавравун ласурча ххуйну хьунссия.