ДР-лул БакIчи Владимир Васильев июньдалул 16-нний увкIунни МахIарамккантуллал райондалийн, хьхьичIмур кьини чятирдал лагерданий хьуну диркIсса къалмакъалданул масъала ххал бигьин. Тикку аьлагъужа хьуну бур дазу лахъан
ялугьлагьисса Азирбижаннал инсантурал ва полицалул дянив. Миннал тIалав дуллай бивкIун бур цивппа анаварну цалла ватандалийн итабакьаву. Полицанайн мютIи къахъанай, къалмакъал сукку дурну, полицанайх чартту бишлай бивкIун бур. Мунияту мура кьини Дагъусттаннайн бувкIун бур АР-лул виваллил иширттал министрнал хъиривчу бакIчисса Азирбижаннал делегация.
ДР-лул вице-премьер Рамазан Жяъпаровлул тIимунийну, Дарбантуллал райондалий салкьи хьуну усса ур дазуйх цала ватандалийн зана хьун ччисса сайки 600 инсан.
— Карантиндалул тIалавшиннардугу дуручлай, инфраструктурагу хIадур дуллай, Азирбижаннал дазул пишакартураща циняв архIал итабакьин бюхълай бакъану тIий, жу АР-лул вице-премьер Шахин Мустапаевлущал икьрал дурссия гьарца кьини дазуйх 100-130 инсан итаакьлан. ХIакьинугу итабакьин аьркинссия, амма лахьхьу Куллар тIисса кIанай ялугьлагьисса Азирбижаннал инсантурал баян бувну бия хIадур дурсса сияхIрал низамрай цивппа рязину бакъашиву. Дайдирхьуну дур къалмакъаллу, ахирданийгу хIала буххан багьну бур органнал зузалтран, тагьар оьлукъин къадитаншиврул, — тIий ур Жяъпаров.
ХIадур дурну дур цIусса сияхI, 155 инсан итаакьин ккаккан увсса. Му сияхIрайн лавсун бур оьрчI-бакI бусса хъами ва хъунив хьуми. Рамазан Жяъпаровлул бувсунни мукунма къалмакъалдануву 6 полицанан цIунцIияртту хьуну душиву, миннавасса ца азарханалийн иян увну ушиву. Мукуна Азирбижаннал 5 инсангу иян увну ивкIссар азарханалийн, миннан хIакиннал кумаг бувну бур. |
Дазуй хьусса иширал хIакъираву бувсунни ДР-лул виваллил иширттал министр Аьбдурашид МахIаммадовлулгу.
Владимир Васильевлул тIимунийну, инсантуран тIайладакъашиву хIисав хъанан диркIукун, ми бакъачIин къуццу буллан бикIайсса бур, закон лиян дуллай. Амма мунийну ми жаваблувшиврия тархъан къабуллалиссар. Закон лиян дурминнан танмихI кьукьинтIий бур.
