Дирунни пасатсса азар зунттавунгу

Дирунни пасатсса азар зунттавунгу

КьурбанмахIаммад Шамхалов

КIира нюжмардул хьхьичI акъассия Ккуллал райондалий цаягу инсан коронавирус тIисса цIуцIаврил къашавай хьусса. Амма дирунни му архсса зунттавунгу.
Ккуллал райондалул азарханалул хъунама хIакин Шамхалов КьурбанмахIаммадлул ва ттул дянив хьунни ва иширайн багьай­сса ихтилат:


— КьурбанмахIаммад, бурив жула райондалий му пасатсса цIуцIаврил къашавай хьусса инсантал?
— Жу хIарачат бувссия, жула райондалул жяматран бувчIин буллай, бурувччуну бикIияра ва цIуцIаврия тIий. Мукун бухьурчагу, дуркIунни жучIанна зунттавунгу му азар.

Райондалул азарханалий му цIуцIаврил увгьусса 40 къашайшала хъин уллансса хIадуршинна дурссия жу. ХIакьинусса кьини, май зурул 18-ннин, жула азарханалий жу хъин уллай буру коронавирусрал цIуцIаву дирсса 12 къашайшала. Уттинин жу му цIуцIаврил къяртта щума райондалия Лаващав тIайла уккайссия. Утти жучIава хъин буллай буру.

— Ми хъин буллансса аьркинлугъру щаллуну дурив?
— Гьай-гьай, щаллуну дур. Буссар жучIа хъиннува захIматну къашавайсса инсаннан аьркин байсса ИВЛ аппаратгу. Бур шанма тах – кислород нани буван бюхъайсса. Ттинин хъин увну, шавайн тIайла уккарду 16 инсан. Лавкьусса палатардаву, 14 гьантлий кьатIув къабуклай, зий бу­ссар мукьва бригада. Ца-ца бригадалувугу уссар ца хIакин, кIива медсестра ва кIива санитарка. Ца бригада зий буссар ряхра ссятрай. Яла, вай бигьалаглай, хъиривмур бригада зун бикIайссар. Дуки-хIачIия гивура дуссар цинявннан дузалсса.

— Вил зузалтран му цIуцIаву хъин дуллансса хIалурду, кIулшивуртту ча лархьхьуссар?
— Райондалул хIакинтурал ва цинявппагу медициналул зузалтрал дистанциялул лагрулий интернетрал кумаграйну 36 ссятрайсса курсру бувккуссар.

— КьурбанмахIаммад, ци учин ччива вин жула райондалул жяматрахь?
— Цалчин, ттун кIицI бан ччива жу, райондалул жяматрал цIуллу-сагъшиврул ялув бавцIусса хIакинтал, медсестрахъул, жувалу ва цIуцIаврищал талан бивтун бакъашиву. Ккуллал райондалул муниципал сакиншиндарал каялувчи Шамил Рамазанов, жула къашайшалт хъин буллан­сса аьркинлугъру Дагъусттаннал ХIукуматрая тIалав дуллай ва ми щаллу дуллай, гьарца кьини жул чIарав ур. Хъунмасса барчаллагь. Ялагу кIицI бан ччива, цIарду кIицI къадулларчагу, дуки-хIачIиялийну ва жула райондалул лавкьусса блокравусса инсантуран кумаг буллалисса ишбажаранчиталгу. Ми цирдагу украри дуллалисса. Укун, инсантурайн оь кьини дуркни, чIарав бацIайсса чиваркI жула миллатрал дянив мудангу бивкIссар, уттигу буссар.

Райондалул жяматрахь, тавакъюрай лаизлай, учин ччай ура: зула зува бурувччуну бикIияра, кьатIух мазанарду, гьуртту махъанарду мажлисирттай, мабулларду мажлисру, зула марцI-чапалшиврул ялув бацIияра. Ялару жува ва цIуцIаврища ххассал хьунтIисса. ЦIуллуну битаннав цинявппагу.
Ккуллал райондалул азарханалий къашайшалт хъин буллалисса хIакинтал ва медсестрахъул циняв жула райондалиясса бур. Цамур кIаная увкIсса цучIав акъар. Ва иширалгу тасттикь буллай бур ччимур балаллул хьхьичI бацIан бюхъай­сса хIакинтал ва медсестрахъул жучIава бушиву.

КIира нюжмардул хьхьичI, алхIаткьини, ахттая махъ, ттул чурххал температура лахъ хьуна. На га цIана оьвкуссия КьурбанмахIаммадлуйн. Ганал гава мутталий ттучIан тIайла бувккун, дачIи ссятравун Вихьуллал амбулаториялул медсестра Сулайманова Гулжагьра бувкIуна. Ганил чивчусса дарурттугу на гара кьини лавсъссия Вихьуллал амбулаториялия. Хъиривмур кьинира, ттул чурххал кIиришивугу яларай дагьну, ахIвал-хIал ххуй хьуна. Вана укун гьарца инсаннал чIарав ацIлай, бувансса чаранну ляхълай ур Ккуллал райондалул азарханалул хъунама хIакин Шамхалов КьурбанмахIаммадгу, ванал зузалтгу. Чан къаданнав зун зулламур цIуллушивугу!

Читайте также: