ЦIуссалакрал райондалиясса Хъунмасса Буттал кIанттул цIанийсса дяъвилул участник Буттаев Аьлил ЖахIпардул арс Ххувшаврил байрандалущал барча унни райондалул администрациялул вакилтурал.
Андриана Аьбдуллаева
Коронавирусрал инфекциялия мюхчан хьунсса чарангу лявкъуну, ветеран барча ан ваначIан шаппай бувкIунни ЦIуссалакрал райондалул бакIчинал хъиривчутал ХIажи ХIажиев ва Алик Исрапилов. ЦIанасса тагьарданийн бувну ветерантал лахъа-хъун буллалисса Ххувшаврил Парад дан къахьурчагу, вайннах дагьайсса къулагъас дан багьлай бур.
Администрациялул вакилтурал, цала чулухасса бахшишру дакъассагу, лавсун бувкIунни ветераннан «Живи и дари жизнь другим» тIисса Дагъусттаннал чирилул фондрал ва «Волонтеры-медики» тIисса Щалагу Аьрасатнал жяматийсса суккушиннарал чулухасса дуки-хIачIия дусса кьуцуртту ва тIутIив.
ХIакьину ЦIуссалакрал райондалий увагу кIия ветеран ливчIун ур. ХьхьичIсса гьантрай райондалул администрациялул ва прокуратуралул зузалтрал укуна барча увссия Алимов Аьвдулхаликь Селимовичгу.
