ХIат-хIисав дакъар махъсса ппурттуву коронавирус ппив хьун къаритаву мурадрай дуллалисса акциярттал ва чирилунсса давурттал. Вай гьантрай маскарду дуруххаврил давривух хIала хьунни ЦIуминалийсса ЦIуссалакрал райондалул Культуралул, жагьилтурал политикалул, спортрал ва туризмалул управлениялул зузалтгу. Вайннал азардахъул маскарду дурурххуну, ми диян дунни ЦIуссалакрал райондалий тIивтIусса оператив штабрайн.

Имара Саидова
— ХIакьинусса кьини маскарду, циксса духьурчангу, диял хъанай дакъар. Агьали ва оьсса балаллуща буруччавур жулмур мурадгу. Мунияту хIарачат буллай буру инсантуран маскардайну кумаг бан, — увкунни Культуралул управлениялул хъунмур ХIабибат Буттаевал.

Шиккува кIицI лаган, ва акциялул сиптачигу, аьркинмунихсса харж бивхьумургу цуппа ХIабибатри.
Мукунма, карантин байбивхьуния шинмай, райондалул бакIчи МахIаммадхIажи Айдиевлул сипталийн бувнугу дурухлай буссия маскарду.