Апрельданул 13-нний ДР-лул ХIукуматрал Председатель Артем Здуновлул дунни ДР-лий коронавирусрал инфекция ппив шаврил хьхьичIалу
кьукьайсса оператив штабрал батIаву видеоконференциялул низамрай.
Цалчин махъ лавхъунни ДР-лул Роспотребнадзорданул управлениялул каялувчи Николай Павловлул. Мунал тIимунийну, хIакьинусса кьини сияхIрайн лавсун ур коронавирусрал инфекциялул реакциялийн тарг хьусса 149 инсан (положительная реакция на коронавирусную инфекцию). Миннавату Москавлив тасттикь хьусса ур 84 инсан, 14 инсаннал коронавирусрал диагноз дукьан дурну дур, амма миннах буруглайнма бур, ца чулийн буккан бувану буну тIий.
Къашавай хьуминнал 20% бур 60 шин ва ххишалагу хьусса инсантал, 10-15% – оьрчI-бакI ва 60-65% – 20-60 шинавусса инсантал.
Яла Николай Павловлул бувсунни къашавай хьуми аьям буллалисса лабораториялул хъиривлаявуртту дуллай бушиву, тестругу ишла дуллай. ЦIанасса ппурттуву зий бусса бур 3 лаборатория: Республикалул лахъай азардал центрданий, Республикалул диагнозирттал центрданий ва МахIачкъалаллал диагнозирттал центрданий.
Мукунма зий бусса бур «Центр гигиены и эпидемиологии» ФБУЗ-рал, «Дагестанская противочумная станция» ФБУЗ-рал лабораторияртту.
ДР-лул МВД-лул бакIчинал хъиривчу Дмитрий Гутырял тIимунийну, 177 инсаннал хIакъираву чивчуну бур самоизоляциялий шаппа личIан аьркиншиврул постановления.
Самоизоляциялул тагьар лиян дурсса 18 инсан увцуну ур жавабрайн.
Республикалул цIуллушиву дуруччаврил министр Жамалуттин ХIажиибрагьимовлул бувсмунийну, коронавирусрал азарданул къашавай хьуми сияхIрайн лавсун бур республикалул 7 шагьрулий ва 11 райондалий.
ХIадур бувссар ХI. Аьдиловлул
