[dropcap]М[/dropcap]ахъ ппурттуву коронавирусрацIун дархIуну хIасул хьусса тагьарданул ялувсса чIиви-хъунсса ихтилат хьунни жул ва ДР-лул культуралул министр Зарема Буттаевал дянивгу.

---

Бадрижамал Аьлиева
— Ва хъинну агьамсса тема хъанахъиссар, биччибакъулшиву дуван цукунчIав къабучIисса. Ттул ласгу, бугьарасса нину-ппугу, душругу, душнил оьрчIругу — жул щалвагу кулпат шаппа щябивкIун буссар, ца мукъуйну учин – самоизоляциялий. Ша­ппа бунугу, гьарцагу инсан чIун оьнна гьан дуллай акъар. Ттул пикрилий, ччимур оьрмулул инсаннан шарда дуллан-ритланмур лякъинссар, ичIувасса кушурду бикIу, ччянияцIакула буккин ччисса, амма чIун диял къа­хъанай диркIсса, лу буккин тIий, ххал дуван ччай бивкIсса кинорду ххал дуван тIий, цалла кIулшивуртту авадан дувансса цайми-цаймигу давуртту тIий.

[dropcap]Н[/dropcap]ава, тIайлассар, даврийн занай бура. Вана хIакьинугу навагу, ца-кIия инсан ялагу даврийн бувкру, къуллугърал буржру кьабитан къабюхълай.
Аьмну Культуралул министерствалия ва мунил биялдаралу зузисса идарарттая тIурчаннив, тагьар даххана хъанан дикIайхтура, дацIан дуварду чIявусса инсантал хIаласса культуралул шадлугъру.

ХIасул хьу­сса тагьарданий тамашачитуращалсса дахIаву руцан къаританшиврул, уттизаманнул технологиярттал каширдугу ишла дурну, культуралул идарартту бувкссар дистанцион режимрайсса зузаврийн. Мукун, интернетрал кумаграйхчин культуралул идарар­ттал бусласиссар цалла давур­ттая, онлайн-режимрай ккаккан буллалиссар спектакллу, буллалиссар экскурсияртту, выставкартту, мастер-классру.

[dropcap]М[/dropcap]асалдаран, Республикалул Халкьуннал творчествалул къатлул жулла республикалул агьалинан ккаккан буллалиссар халкьуннал канил пишардал мастер-классру. Уттигъанну хьунни «Макьам» ансамбльданул ва балайчи Тельман Ибрагьимовлул концерт, соцсетирдаву хъинну чIявусса тамашачиталгу гьурттуну.

А. Тахо-Годил цIанийсса Национал музейрал буллали­ссар онлайн-экскурсияртту. Оьрус­нал театрданул, Ссихьрал театрданул, Лакрал, Яруссаннал, Къумукьнал, Табасараннал театрдал ккаккан буллали­ссар личIи-личIисса спектакльлу.

[dropcap]О[/dropcap]нлайн-мероприятиярттал гьарта-гьарзасса афиша дуссар Культуралул министерствалул сайтрай ва цаймигу хасъсса лажинтирттай. Укуннасса кьаралданий зий бур жулва билаятрал цайми регионнугу.

Цинявннайн оьвчаву дуллай бура шаппа-шаппа щябикIан, зуллагу, зунма ххираминналгу цIуллушиву нигьачIавривун къадутлан. Щаллу дуллалияра жула билаятрал Президентнал, жулла Республикалул БакIчинал цала Указирттаву ккаккан дурсса цинярдагу тIалавшиннарду. Зулва зува бурувччуну бикIияра!