«Дадай, мяммай, буруччияра жу.
БацIияра шаппа»

Укунсса оьвчаву дунни социал сетирдайхчIин цала нитти-буттайн ЦIуссалакрал райондалул оьрчIал.

Андриана Аьбдуллаева
Жунма цинявннан бувчIла­чIисса куццуй, пандемиялул чIумал кьатIув къабуккаврийну бюхълай бур жущава мюхчан хьун. Махъсса цаппара гьантрай мюрщисса оьрчIал, хъуними уссур-ссуннал кумаграцIух, телефонная гьан дуллай бия шаппа бацIияра тIисса видеороликру ЦIуссалакрал райондалул администрациялул информациялул технологиярттал ва СМИ-лущалccа дахIавурттал отделданийн. ЧIявуми нитти-буттан ххуйну пикри бансса, чара бакъашиву дакъана кьатIув къабуккансса ишну хьунни вай оьвчавуртту.

ЦIуссалакрал райондалул оьрчIал сукку дурсса флешмоб­раву гьуртту хьун бюхъайссар ччиманаща. Видеоролик гьан дан хьунтIиссар вайннал электрон почталийн ягу социал сетирдайн. Флешмобрал лагрулийсса видеороликирттаву оьрчIаща бусан хьунтIиссар мукунма лахъисса каникуллай шаппа цивппа ссаха зий буссарив.
Ххирасса нинухърув, ппухълув! Зул оьрчIру ва оьрчIал оьрчIру оьвчаву дуллай бур зуйн, шаппа бацIияра тIий.
Журив банну зухь цаппара мюнпатсса маслихIатру:

1.ЧIавахьулттив тIивтIуну, къат­равусса гьава цIу буккан бара. Гьантлун цал дунугу, дезинфекция дайсса затру ишла дурну, ужагъ шюшу-лакьу бувара.
2.Мазанарду общепитрал, кIулшивуртту дулаврил, дялахърулул центрдайн, оьрчIал площадкарттайн, паркирдавун ва цаймигу жяматийсса кIанттурдайн.
3. ОьрчIащал сайр бан буккияра так зула дачардайн ва зува заллусса кIанттурдайн.
4.Чара бакъашиву дуну кьатIув буккан багьарча, бувчIин бувара оьрчIан нузкьунттал каймурдайн, лифтрал кнопкарттайн, чIирттайн, мукунна лажиндаравун ка щун къабучIишиву.
5.Шаппай зана шайхту, каруннал дезинфекция дан аьркинссар. Ликкан аьркинссар зуйра диркIсса янна. СсахIван бувккун, ххуйну шюшин аьркинссар лажин ва кару. Вилаган аьркинссар кьацI ва май.
Вай маслихIатру щаллу барча, зу зувагу мюхчан хьуну, зула кулпатравумигу мюхчан бантIиссар коронавирусрая.

ЦIуллушиву
дулуннав!