Хъун дяъвилул ва захIматрал ветеран, 3 ордендалун ва 16 медальданун лайкь хьусса талатала, дяъвилул I-мур группалул инвалид, ЧIурттащатусса ХIамидлул арс Мусиев Аьлибаг увну ур 1922 шинал январьданул 17-нний.
Увну 7-мур зуруву мунал ппу ХIамид ивкIуну ур. Ниттил, Гьажардул, Аьлибаг ва мунал кIия уссу (Нажмуттин, Аминагъа), хьхьу-кьини къакуну колхозраву зий, ччаннай бацIан бувну бур.
1939 шинал Аьлибаглул къуртал бувну бур Гъумучиял педучилище, зун ивкIун ур учительну Ккуллал райондалий Ссухъиящиял шяраву. 1941 шинал май зуруй му увцуну ур ЯтIул аьралуннавун, гьан увну ур дуклан Ттуплислив, радиотелеграфистал шайсса училищалувун. Му чIумал байбивхьуну бур Буттал кIанттул цIанийсса Хъунмасса дяъви.
1942 шинал августрай Аьлибаглул къуртал бувну бур училище. Му чIумал Германнал аьрал кьувтIуну най бивкIун бур Къапкъазуллал зунттавун. Цинявппагу зунттал халкь, хьхьу-кьини дакъа зий, фронтран кумаг буллай бивкIун бур. Хъами, чIава жагьилтал – дяъвилул цIакьшивуртту дуллай. Вагу дяъвилийн хъита тIий ивкIун ур. Цала ххирасса буттал гьав Къабардиннаву Баксаннай дуна, мунаща ссавур дан бюхъайссияв, душман му кьюкьин дуллай, Ватан ккуччу дуллай ивтун.
Ми Каспий хьхьирийх Туркманнавун бивчуну бур. Яла Мары тIисса шагьрулийн тIайла увккун ур. Дяъвилийн аьркинсса радистал хIадур буллай, миннахь дарсру дихьлай Марылий Аьлибаглул ца шин дурну дур.
1943 шинал августрай Сычёвка тIисса шагьрулий сакин бувну бур 192 битултрал дивизия (полковник А.М. Ковалевский). Аьлибаг увтун ур му дивизиялувусса 490-мур битултрал полкиравун (майор Стерлигов). Яла бивчуну бур маршал К.К. Рокоссовский командующийсса Украиннал I-мур фронтрайн.
Аьлибаг зий ивкIун ур дивизиялул радиостанциялул начальникну. Москавуллая арх бакъасса шагьрулий бусса чIумал, душманнан кIул хьуну бур радиостанция бусса кIану. Битлан бивкIун бур ттупру. Аьлибаглул амру бувну бур ччя-ччяни радиостанциялул кIану баххана буллан. Циксса ттупру битларчагу, радистурал фронтращалсса дахIаву дуцан къадиртун дур. Му иширал хъунмасса кумаг бувну бур жула аьралуннан Смоленск шагьру ласун. Душманнал кьаст хьуну дур радиостанция бухлаган бан. Ялун тIайла дурккун дур шанна самолёт. Бивчуну бур бомбарду. Жула аьралуннал самолётирттайн ттупал цIу тIиртIуну дур, вайнналгу ххювабитулт бурган бувну бур. Ссавруннай пуркIурал магъгу кьадитлай, ца самолёт, ччучлай, вацIлул чулухуннай ларгун дур. КIилчинмур самолётрал бувтсса бомба вайннал машиналул чIарав багьну, Аьлибаггу, ванал радистгу экьи ливчуну бур. Радист гавацIана ивкIуну ур. Аьлибаг тIурча, контузит хьуну, чIу къабаллай ивкIун ур. Амма фронтращалсса дахIаву зия хьун къадиртун дур. Душманнащал кьянкьану данди бацIаврихлу ванан дуллуну дур «Буттал кIанттул цIанийсса дяъвилул I-мур даражалул Орден».
Ца зурува, хъин шайхту, Аьлибаг зун ивкIун ур 490-мур полкрал рациялул начальникну. Смоленскаллал баргълагавал чулух гужсса талатавуртту нанисса чIумал, полкрал командирнал Аьлибаглуйн амру бувну бур, рациялущал душманнал къинттуллухун гьан. Му хъинну захIматсса бигар бивкIун бур. Бявкъусса ноябрь барз, хьхьу, ттурлу, лажин ччуччин дуллалисса бявкъусса марч.
Радист Шепеленкощал архIал вай хIаллих вацIлувух бавчуну бур. Вай хIисав хьуну, душманнал дзотрава автоматрал ва пулемётрал цIу дирхьуну дур, зев-зев тIий, чIарах ккулларду лехлан бивкIун бур. Шепеленкол ссюрхъирайн щаву дирну дур. Ца рахIув кIучI хьуну, гьалмахчунал щавугу дархIуну, дякъил кьарчI бивкIун, вайннал гикку хьуну дур ссятру. Чаннахь, ца шяраваллил зуманив леркьсса чIаркIув лабивкIун бур. Мукун лабикIлай, ца кIанава цамур кIанайн занай, ккавкмур рациялувух лавайминнайн баян буллай, душманнал къинттуллух вайннал 7 гьантта хьуну бур. Бягу бявкъуну, ккашил аз хьуну махъунмай нанисса ххуллий, фронтрал дазуй вай хIисав хьуну, душманнал танкалува пулемёт битлан бивкIун бур. Вай сагъну буна бугьан ччай, танк дарчуну дур вай лабивкIсса траншеялучIан. Му чIумал вайннал кIинналагу палцI дурну дур цIу лачIун дай шушри. Танк ччучлан диркIун дур. Ялун бивсса жуламиннал кумаграцIух, танкалува увксса 6 душман ясир увну, полкрал штабрайн биян бувну бур. Му къучагъшиврухлу Аьлибаглун дуллуну дур ЯтIул ЦIукул Орден.
Муния махъ вай бивчуну бур Белоруссиянал 3-мур фронтрайн. 1944 шинал, Орша шагьрулучIасса талатавурттаву душманнал кIия радист увгьуну тIий ва фронтращалсса дахIаву ххуйну ядурну тIий, Аьлибаглун дуллуну дур «Къучагъшиврухлу» («За Отвагу») ва «Талатавурттаву лайкь шаврихлу» («За боевые заслуги»). Мура 1944 шинал, апрельданул ахирданий, Орша шагьрулул ухссавнил чулух вайннал радиостанциялин душманнал самолётирттал бомбарду бивчуну бур. КIия радист ивкIуну ур, вайннайнгу захIматсса щавурду дирну дур. ЦIалцIив дурххун дур гьутрулувун, кьуртIуну дур лажиндарайн, бакIрайн. Госпитальданийн увцуну нанисса ххуллий, носилкардай, ччаннайнгу захIматсса щаву дирну дур. Мукьва зуруй хъин хъанайгу ивкIун, Аьлибаг, комиссоват увну, шавай гьан увну ур 2-мур группалул инвалидну.
Дяъвилия учIайхту Аьлибаг зий ивкIун ур ЧIурттахьсса почтрал начальникну, Жуковлул цIанийсса колхозрал кладовщикну, счетоводну. 1951 шинал му лавгун ур ЦIуссалакрал райондалийн, зун ивкIун ур ЦIусса ЧIурттахь Ждановлул цIанийсса колхозраву. Заочнайну дуклай, къуртал бувну бур Шяраваллил хозяйствалул институтрал экономический факультет. 1980 шинайннин зий ивкIун ур колхозрал бухгалтерну. Муния мукьах Аьлибаг яхъанай ивкIссар МахIачкъалалив. Аьлибаг аьпалул хьуну ур 1986 шинал.
Ваналгур гъан дурсса жучIанна Хъуннасса Ххувшаврил байран!
Жул корр.
