Республикалул Оператив штабрал батIаврий

Апрельданул 21-нний хьусса ДР-лул Оператив штабрал батIаврий ххал бивгьунни республикалул экономика ляду­ккаврил ва коронавирусрал инфекция ппив

шаврил шартIирдай социал тагьар цалий дацIаврил хIакъиравусса масъалартту. Ихтилат хьунни мукунма идарарттахьхьун зунсса ихтиярду дулаврил хIакъиравугу.


[dropcap]М[/dropcap]асъалартту ххал бигьаву хьунни видеоконференциялул низамрай ДР-лул Премьер-министр Артем Здуновлул каялувшиврий.
ДР-лул Роспотребнадзорданул управлениялул каялувчи Николай Поповлул тIимунийну, хIакьинусса кьини бувкIун бур 4545 заявление инструктаж баврил ва методикалул указанияр­ттал лагрулий давурттал кьимат бищаврил хIакъираву, миннувух «Ттул Дагъусттан» тIисса порталданийхчилгу. Миккува бур бувсун 19 азара инсан зузисса 1617 идара (учреждение) хIадурну бушиву зун. ЦачIанна дуркIсса заявкартту ххал дигьлагьисса чIумал Роспотребнадзорданул управлениялул зузалт­ран кIул шайсса бур, ишбажаранчитурал къабусайсса бушиву минначIа дезинфекциялун аьркинсса ва цивппа зузалт инфекциялия буруччинсса затру душиву ягу дакъашиву.
Артем Здуновлул бувсунни МахIачкъалаллал ва республикалул бизнесчитуран бувчIин аьркинну бушиву циняв цачIу кьамул дурсса кьяйдарду дуручлан.
Республикалул виваллил иширттал министрнал хъиривчу Дмитрий Гутырял тIимунийну, азарданун хасну дазу рищаврил чаранну ккаккан бувну махъ, республикалул агьалинай дюъ дирхьуну диркIун дур карантиндалул низам дуручлан. Амма чIявуминнал дуручлай бакъар самоизоляциялул тIалавшинну, мунийн бувну республикалий буниялану чIуруну дур транспорт дачаврил низам.
Яла ихтилат бунни ДР-лул экономикалул ва территориярттал лябуккулул министр ХIа­жи Султановлул. Мунал тIи­мунийну, цIанасса ппурттуву ДР-лул БакIчинал хIукмулийн бувну, цалла давуртту лахъи лаган дурну дур сайки 6000 идаралул, миннуву зий ур сайки 27 азараксса инсан. Апрельданул 13-нния махъ зий байбивхьуну бур промышленностьрал идарартту. Микку зий ур 5,6 азара инсан.
ДР-лул ХIукуматрал Председательнал тIимунийну, цIана дайдирхьуну дур республикалул Промышленностьрал ва Энергетикалул министерствалущалсса давуртту, хаснува «Дагдизель» предприятиялун ккаккан дурну дур заказ. Премьернал тапшур бунни Дагъусттаннал циняв идарарттан кумаг буллан аьркиншиву.
БатIаврий махъру лавхъунни ДР-лул строительствалул ва ЖКХ-лул министр Малик Баг­лиевлул ва ДР-лул Ишбажаранчишиврул ва инвестициярттал агентствалул каялувчинал 1-ма хъиривчу Камил Ма­хIаммадовлул.