Аьлтту хьунни цаймигу къашайшалт

Апрель зурул 8-нний ЦIуссалакрал райондалийсса ДучIиннал шяраву аьлтту хьунни коронавирусрал цалчинсса лишанну дусса кулпат.

Имара Саидова
Мукьа инсан усса кулпатрал дуллусса цалчинсса анализир­ттал мяйжан бунни коронавирус душиву. Утти ва кулпатрал анализру гьан дунни Москавливсса референс-центрданийн коронавирус дусса, дакъасса мяйжан хьуншиврул.

Къашай хьуминнаву бур ца хъамитайпа ва шанма оьрчI. Хъамитайпалул бусаврийн бувну, вайннал кулпат хIалану бивкIун бур Москавлия бувкIсса мачча-гъанминнащал. ЦIуссалакрал райондалул бакIчинал ва региондалул Роспотребнадзорданул каялувчитурал анаварсса мутталий вай жяматрая личIий бувну, гьан бувну бур азарханалийн.
ЦIана хъирив бивзун бур вайннащал хIала-гьурттуну бивкIсса инсантурал тагьар ххал дигьлай.

ДР-лул Роспотребнадзорданул зузалтрал хъинну ялув бавцIуну ххал бигьлай бур дазул кьатIату бувкIсса бакъа­ссагу, Аьрасатнал региондалия бувкIсса агьалигу.
Чил билаятрая, ягу Аьрасатнава Дагъусттаннайн бувкIсса инсантал чара бакъа гьан буллай бур кIира нюжмардийсса карантиндалийн.