Лакрал райондалул бакIчи Юсуп МахIаммадовлул оьвчаву
ХIурмат бусса Лакрал райондалул жямат ва бувкIсса хъамал!
Щалагу дунияллий COVID-19 коронавирусрал инфекция анаварсса бущилий ппив хъанахъаву сававну, жула билаятрайгу хIасул хьуну дур жапасса тагьар.
Аьрасатнал Президент Владимир Владимирович Путиннул ва Дагъусттан Республикалул БакIчи Владимир Аьбдуаьлиевич Васильевлул хъинну балжисса, хъирив лавсса ххуллурду ласлай бур инфекция ппив хьун къаритаврил цIаний.
Жула райондалул агьали коронавирусрал инфекциялия мюхчан баву мурадрай, дуллай буссар цила чIумалсса давуртту.
ХIакьинусса кьининийн райондалий акъар коронавирусрал къашавайсса инсан. Агар ва цIуцIаву дирсса инсан ялун личирча, райондалул азарханалул зузалт хIадурну буссар цила чIумал аьркинсса кумаг бан.
Анаварсса ва хIакьсса информация бивщун буссар райондалул официал сайтрай: www gazikumuh.ru «Мой Дагестан» порталданий «Коронавирус» тIисса цIанилу.
Лакрал райондалийсса тагьардания кIул бан бюхъантIиссар «Горячая линиялийн» оьвкуну: 55-17-80.
ХIурмат бусса Лакрал райондалул агьалий!
Ттул зухь тавакъюри: чарабакъашиву дакъа, кьатIу-шав мабуккари.
Хаснура хъуннасса къулагъас дан багьлай бур оьрмулул 65 шинава бувксса инсантурах. Макьабитари ми аякьа дакъа, иттала буккан мабару ми. Тавакъюри миннал гъан-маччаминнахь, чIахху-чIарахнахь, маз-ка дияйнахь, миннан дуки-хIачIия, даруртту биян бан, чIун-чIумуй телефондалувух оьвчаван, цIуллушиврия цIуххаван.
Жула райондалул аьрщарай вирусраяр ххув хьун, му ппив хьун къаритан бюхъантIиссар так цачIусса кабакьаврийну, цачIусса кумаграйну, гъан-маччаминнал, лагма-ялттуминнал цаннал цанначIан хIурмат буну зана-кьулу хъанахъаврийну.
Мунищала архIал тавакъю буллай буру, агар, зула шяравун цамур региондалиясса, цамур билаятрайн лавгун увкIсса инсан уххарча, райондалул, шяраваллал администрациярттайн баян бан, «Горячая линиялул» телефондалувух оьвчин.
Ххирасса аьрщарайчувтал!
ЦIана дуркIун дур чIун оьрмулул жула хIал ккаклакисса. Бачияра циняв цачIун хьуну таланнуча ва оьсса балаллущал. Буруччара профилактикалул ххуллурду, къулагъас дувара зула ва зунма ххираминнал ва гъан-маччаминнал цIуллушиврух!
Бурувччуну лякъиннав жува Заннал!
