[dropcap]К[/dropcap]алининградрая увкIсса хъамаличу махъунай лавгун махъ, ганай коронавирусрал цIуцIаву дусса ашкара шайхту, мугьлат бакъа карантин баян бунни ЧIарттал шяраву.
З. Тахакьаева
[dropcap]Ш[/dropcap]яравугу, хъамаличу увхсса къатравугу дурунни гьарца аьркинсса дезинфекциялул давуртту ва дуллайнма бур гьарца кьини. Хъамаличунащал хьунабавкьусса инсантурай цIакьсса къадагъа дирхьуну дур кьатIув къабуккан. Шяраваллил администрациялул бакIчи Микьдар Аьбдулмажидовлул бусаврийн бувну, ФАП-рал хъунмур Написат Аьлисултановащал гьарца кьини шяравух буклай бур, профилактикалул давуртту дуллай, карантиндалийсса инсантуран аьркинмур диян дуллай.
ХIакьинусса кьини шяраву усса ур коронавирусрал цIуцIаву душиврийн щак бусса шама инсан. Амма, райондалул азарханалул хъунама хIакин АьвдурахIин Дибировлул бусаврийн бувну, диагноз тасттикь хьун уттигу дурар. Ванал кIицI лавгунни щак бусса инсантал къулагъасралу бушиву, гьантри ляхну шяравун занай бушиву «Анаварсса кумаграл» машина.
[dropcap]Ш[/dropcap]яравун машинартту гьан-бучIан, инсантал кьатIушав буккан къадагъа дурну диявхьур, чан бакъар шяраваллин ихIсандалул кумаг буллалимигу. Уттинин шяраваллил агьулданун кумаг бунни Сургутрай ялапар хъанахъисса шяравучутурал, вайннал дуркIунни коронавирусрал цIуцIаву ппив хьун къаритансса медициналул кьай-кьуй.
Волонтертурал мукунма биян бунни Лакрал райондалул администрациялул бакIчи Юсуп МахIаммадовлул ва ДР-лул Халкьуннал Мажлисрал депутат ЖахIпар Абуевлул чулухасса дукиялийнусса кумагругу.
[dropcap]Ш[/dropcap]яраваллил жяматрал цIания Микьдар Аьбдулмажидов барчаллагь баян буллай ур кьини дурксса чIумал чIарав бавцIусса инсантурайн, райондалул азарханалул хъунама хIакин АьвдурахIин Дибировлуйн ва медициналул зузалтрайн.
