Ца-ца чIумал инсаннал хасият дурчIин къахъанахъисса кIанттайн дияй. ЧIалай, бувчIлай бунува цанма зарал хъанахъишиву, ялагу уссар га аьркин дакъасса тIуллахун агьлай.

Муна мукунсса, зарал биян буллалисса, давуну хъанан дикIай инттухуннай лухччацIух, зунттурдацIух цIу щилащаву.

---

КъакIулли административ кьануннай ва иширан ци танмихI ккаккан бувну буссарив. Ттун кIулссаксса, махъсса урчIра-ацIра шинал мутталий цучIав кьанундалийн кIункIу увссар тIисса хавар къабавссар ттун. «Суннайсса, гьаннай­сса дукIурасса кьаркь уртту ччу­ччирча, ччяни щюллими ялун личайссар», — тIун бикIай. Ттул пикрилий, ва инсантал хъинну бяйкьлакьисса ишри. Ялагума заралли хъанахъисса. Ччучлачиссар урттувусса ущу-щулгъи, ччучлачиссар урттул мархри. Цукунни яла, туну, ччувччусса мархрава уртту ххяххантIисса?

Ххишалдаран, вай зунттурду ччучлачисса кIанттаяту нанисса пуркIу сававну, асмалул ва цаймигу гьут­рурдал цIуцIавуртту дусса инсантураща кьатIув бу­ккан хъанай бакъар. Шяраваллил цIа кIицI къадарчагу, ттул янилун дагьунни хIатталлицIухгума цIу дуртун.
Цаппара шиннардил хьхьичI 1-мур ЦIувкIуллал шяраваллил бакIчи Кьурбанов МахIаммад (ганащал ттул гьарта-гьарзасса дахIаву дуссия), мукун цIу дуртсса лухччи лещан дан машиналий най унува, ахьния агьну, аьпа­лухьхьун лавгунни. Щил­чIав ва иширал ялув жаваб дуллушиву ттун къабавунни.

Явара, цIу рутавугу тиха-шиха увкIманал къадуллалиссар, жула зунттаву яхъанахъисса лак­рал инсантуралли дуллалисса.