Барча уллай буру

«Ватангу ядурссар, яхIгу бурувччуссар». Вай мукъурттищал­сса, Виричунал цIукул ва ххаржандалул къалипрай дурсса ххаллилсса медальданул авадан бунни вай гьантрай «Илчи» кказитрал наградарттал ххазна.

Ва дуллунни кказитрал хъунама редакторнал хъиривчу Руслан Къардашовлун.


1999 шинал Дагъусттаннал аьрщарайн ххявхсса террористал ххит бувну 20 шин шаврин хасну Лакрал миллатрал советрал председатель, та ппурттуву ополчентурал штабрал хъунаману ивкIсса, Амучи Амуттиновлул сипталийну вай медаллу заказ дурну диркIссар Къазаннал цIанихсса Монетный двордануву.

Медаллал эскиз дурссар Аьрасатнал Архитектортурал союзрал член, Да­гъусттаннал паччахIлугърал премиялул лауреат ХIажикьурбан ХIажикьурбановлул. Медаллу дуллуссар ополчентуран ва дяъвилул ишру нанисса чIумал хъуннасса хъар лархъсса инсантуран. «Ватангу ядурссар, яхIгу бурувччуссар». Вай мукъурттил цала буслай бур ссахлу лайкь дурссарив вай медаллу.

Жу дакIнихтуну барча тIий буру жула коллегахь, хIурмат бусса Руслан Аьбдулманаповичлухь, ххаллилсса награда. Ванияргу бюхттулсса, ххарисса иширттацIун дархIусса наградартту ласлай ккакканнав!

«Илчи» кказитрал коллектив