— АрулцIаллахъул шинну ларгунни, ппу дакIнийн агьтари, на хъювуссул буклай, яру мукьал буцIлай, — укун байбивхьунни ттущалсса ихтилат Цалчинмур ЦIувкIратусса,
40 шинай ЦIуссалакрал райондалий математикалул дарсру дихьлай оьрму бувтсса захIматрал ветеран Рамазанова Басиратлул.
– Яла махъри ттухь ниттил балжину бусантIисса 1941 шинал дайдихьулий щарнил Хъун ккурчIав хъанай бивкIмур, зюрнав-накьарттул щатIив щалагу шяравух гьалакну бишлай бивкIшиву — Ватан дуруччин нанисса вирттаврахь ххуллухъин тIутIисса мажлисрал щатIив, ттул ппу Оьмар чIаххувчу Муртащал аьрайн най ивкIшиву. Ттун тани ци бувчIинссия, шин хьусса душ бивкIун бура, амма, аьтIутIисса ниттил ва ссил иттавгу буруглай, нагу аьтIий бияв тIар. Ххишала ппу къаккаккансса кIулну аьтIий бухьунссияв.
1943 шинал февраль зуруй Басиратлул ппу Оьмар цала дус Муртащал виртталну ливтIунни тIисса лухIи хавар бувкIун бур буттал шяравун. Муртама яла сагъну увкIссар, амма маз хъамабивтун, 23 шинай маз бувхIуну ивкIссар. Ца хьхьуну тIурча, Оьмаргу гьурттусса талатаву макIра хьуну, «Вперёд за Родину, за Сталина!» тIий чантI увкуну ур. Муния махъ мазгу итххявххун бур. Муртал яла бувсун бур самолетрая бувтсса ттуп тIайланма цувагу, Оьмаргу усса кIанайн багьну бивкIшиву, Оьмар усса кIанай хъуннасса ханнакь хьуну диркIшиву, цувама, госпитальдания уккайхтугу, маз бувхIунува ливчIшиву.
ЛаснацIа хьусса Муъминатлун, Басиратлул ниттин, оьзру цуппалу къабикIан тIисса кунма, ЦIуссалаккуйн бизан буваврил хIасратгу духIан багьну бур. Колхозрал давурттив дуллай къурув бунува, баргъ лавчIун, 1945 шинал Муъминатгу дунияллия лавгун бур.
Басират Гъумучиял детдомрайн багьну бур. Цила тIийкун, «хIукуматрал оьрчIал» кьюкьлувун багьаврия аьсивну бакъар, нину-ппушиву паччахIлугърал дуруна тIий бур ва.
— Яла-яларив, детдомрайсса жу оьрмулухунма цIакьсса дустал хьуссияв, — тIий бур Басират. — Ттул дустуравух буссия ттуярвагу хъунмасса Маммаева Мариян (ихтилат жула цIанихсса балайчи Мариян Дандамаеваятур). На мунийн Маммаева куну бакъа угу-къаучара, мунил ласналмур фамилия ттун зумух ласун ччан къадикIай. Ца цамургу Аьлиева Нина тIиссагу буссия ттущал дусну, жула лакрал машгьурсса балайчи Жамал Абакаровлул нину. Буссия ХIажиева Миясат ва Аьлилова Умамат тIисса душругу. Жу, детдомрал коллектив, концертру ккаккан дан хIатта яруссаннал ва ссурхIиял шяраваллавунгума буцайвав. Марияннул нукIузаманнул балайрду учайва, га балай тIутIийни, зал пахъ багьайва.
Ттущал ца классраву дуклакисса оьрчIаву Гъумучиял школданий личIинува итххявхсса оьрчIру ва душру бия, мяйра шинал мутталий ттущал ца парталух щябивкIун бикIайссия хIакьинусса филологиялул элмурдал кандидат, лакку мазрал аьлимчу Роза Эльдарова (Мусиева). Жу цаннилвагу, 5-мур классрава байбивхьуну, 10-мур классравун бияннин царагу дарсирал мукьва къалавсъссар. Мукунма хъинну ххуйну дуклай бикIайва Аьлиев Камил ва МахIаммадов Арсен. Арсен оьрус мазрай бюхханну шеърирду буккаврил гьунар бусса оьрчI икIайва, му личIинува ххирая оьрус мазрал учитель МахIаммад Шовкринскийн. Арсен хIакьину, найрдал ницIая даруртту буллай, инсантал хъин буллай ур.
Байбихьулул классирттаву жухь математикалул дарсру дишайва Муъминат Шагьмардановал, лавайми классирттаву – Мариян Къажлаевал ва Нураттин Маммаевлул, — вайгу медалистътал бия, гужсса учительтал бия.
ЦIуссалакрал райондалий мукьцIалла шинай дарсру дихьлай оьрму бувтсса Басиратлун хIакьинусса кьинигу ЦIуминалийн бизан баврил масъала лахъи лаган буллалаву кьурчIи бизлай бур. «Бикъавзун пайда бакъахьувкун, бизан багьлай бур, амма бизан бувну къуртал буван хъанай бакъар хIукуматраща, дурар дагьайнан къатри дулун, къулайсса шартIру дузал дуван. Ттунна лажин къаккарксса ттула ппу ссал цIаний ивкIуссар тIун бикIара ттива-тти. Ттул буттауссурвал Тажуттин ва Мусагу лавгссия аьрайн. Тажуттин зана къавхьуна. Ясирну агьну ивкIсса Муса буттауссингу ккакъавк къаливчIссар. АцIва класс къуртал бувсса чIумал лавгссияв тачIав ттуна къаккавксса буттауссу ккаккан. Чилнура ляркъусса миналий ччяни дунияллия ларгсса ниттиха зума тIийма оьрму лавгунни.
Цила дакIнийн бивчуминнул ялун Басират ххи буллай бур укунсса махъругу:
— Ххувшаврил байран гъан хъанай дур. Ва на аьтIун бикIай кьинир. Ятинну навалу личIарчагу, чивун буккан хьунни, къатта- къуш, оьрчIру хьунни, инсантурал хIурмат къалиянну оьрму бутан хьунни. Амма буттахсса мякь къалавгунни дакIния, иттавсса макьгу къакьаркьунни 75 шинал лажиндарай…
ПатIимат Рамазанова
