Щалва билаят, щалла дуниял цIанакул карантиндалий дур. Карл Маркслул «Коммунист партияллу манифестрал» дайдихьу дуллалисса машгьур­сса махъру баххана бувну

учин, «дарс дизлай дур Европанаву- коронавирусрал дарс, щаллагу дунияллий –коронавирусрал дарс…» Гьаннайсса , коронавирусрал дарсгу, ххяппагу дизлазисса ва ппурттуву яла вихшаламур кIанугу, жува буруччин­сса къалагу бур шаппалу.

Ччарча республикалул хъуними, ччарча хIакинтал шаппа бацIияра тIий бунува, хIакинтал, жу зул цIуллушиврул цIаний хьхьу- кьини, кьуния мукьрагу ссятрай зун хIадурну буру тIий бунува, би­ччибакъулну кIичIирттавух бук­лакимигу чан бакъая вай гьант­рай. «ЛитIурча музыкалухун рирщуну- рурцуну литIунну» тIий хъатIайн наниссагу бия, «Аллагьнал чичру мукунсса духьурча оьрватIуй ччан бивзунугу литIайссар»- тIутIиссагу бия. Бия буван яла бигьамур бувну, аькьлулий ва ссавурданий ша­ппа бавцIуссагу.

[dropcap]И[/dropcap]чIаллия къала бувну. Хансса, биргьарав­сса, «вирусирттая нигь дакъасса вирттал» тIулуйн буцин биялсса хIарачат буллалимигу бия. Лакку зумунусса оьвчаву дунни, лакку гьавккури бувну Франциянаву яхъанахъисса зунттал душ- эмигрантка Асват Янгиевал. Ши­ккува хIазичун кунма бусан, ва лаккучувнан щар хьуну бур, вай цаннайн ца бакIрайн багьну бур Москавлив, лакку мазрал курсирдай. Укун жулва гьавккур­ттугу буллай, шаппа бацIияра , ххирасса лак! Жува, гьай- гьай, сивсусса, савсъсса,кьянкьа- кьурчIисса агьлуру.

Амма жулла зумунусса къуртIру дай чIун дакъар. Буван багьаймур бувну шаппа щябикIавугу хьхьарашиву дакъар. Жулва буминнайгу, жулацириннайгу цIими бувну, нанияра къаххяхланнуча вирусрал цIаравун. КьатIу- шав, давурттайн къабувккун пайда бакъами букканссар. Аскисса азарданул гъаглувун ххяххаву тачIавгу чувшивуну къадиркIссар ва ххуллухгу къадикIантIиссар.

ДакIнихтуну мукIру хьунна, вай гьантрай цал аьтIаву ларчIунни ттуннагу: жула редакциялул ва кказитрал вирдакI Руслан Къардашовлул, зу шаппа бацIияра, на даврийн увкра, учайхту. ЦIуллуну битаннав! Ялун бивсса кIул бакъа балаллува саламатну буккан­сса ссавургу, цIуллушивугу Аллагьу Тааьланал дулуннав, жулва хIарачатрацIун кабакьиннав! Цалссарив, шаппа бацIияра! Кьамул дувара ва гьарцагу чантI увкусса ва дакIцIуцIаву дусса инсаннал зумувсса миннатрал дуаь!

ПатIимат Рамазанова