КIундиннал шяраваллил дянивмур даражалул школалул дуклаки оьрчIругу цIанасса чIумал бур дистанцион журалул дарсирдай.
Ми дарсирдал хIакъираву школалул директор Абакар Гуйдалаев буслай ур укун:
— Махъ ппурттуву хIасул хьусса тагьарданийн бувну, чIявусса цайми кунма, жул оьрчIругу буссар цIана шаппа-шаппа щябивкIун, региондалул, щалагу Аьрасатнал кIулшиву дулаврил порталлайн бувххун, микку дуклай, дарсру дуллай. Мисалдаран, «Российская электронная школа» (РЭШ), «Яндекс-учитель», «Яндекс-репетитор», «Мегафон-онлайн» ва цаймигу ххуй-ххуйсса сайтирттайн бувххун, кIулшиврул программа къаличIанмур буллай.
Учительталгу буссар зий, манзилданий оьрчIащал давуртту дуллай. Гьашину экзаменну дусса оьрчIащал, яни 9-мур ва 11-мур классирттал оьрчIащал, хъиннува хъинну зий буссар, манзилданий миннахьхьун тестирдал журалийсса личIи-личIисса вариантирттал, журардал давуртту дуллай, ялув бавцIуну.
Гьашину 11-мур классраву ур 7 оьрчI, 9-мур классраву ур 4 оьрчI. 9-мур классрал оьрчIал гьашину дулунтIиссар тIий бур чара бакъа дулун аьркинсса кIира экзамен – оьрус мазрал ва математикалул. АцIния цалчинми классирттал экзаменну тIурча, гайми шиннардийнияр цахъи махъ дикIантIиссар тIар.
Школалий ацIния цавагу класс щаллуну буссар.
ЧIаратусса, Ккурклиясса ва цаймигу лагмащархъаясса оьрчIругу бучIайссар жучIан дуклан.
ЦIанасса чIумал, шаппа-шаппа щябивкIун дарсирдахух гьарча бакъа, оьрчIащал классрал кьатIувсса давуртту дуллан хъанай бакъар. Амма оьрчIру цIанагу гьуртту хъанай буссар дистанциялий дуллалисса личIи-личIисса конкурсирттай.
ЦIана учительтал ва нину-ппу, манзилданий бунугу, цачIуну, оьрчIал дуккаврил ялув бавцIуну зий буссар вотсаправу бикIу, укуннасса телефондалул зангирдайну бикIу, кувнначIан кув оьвтIий.
Амма дур ца диялдакъашиву, оьрчIал дуккаврихун дайшишру дуллалисса – интернет хъинну «загруженныйну» дуну, Аьрасатнал дуккаврил сайтирттайн, порталлайн буххан захIмат хъанай бур, цуппагу укунмагу лахъсса зунттаву интернетрал бущи хIурхIасса кIанай. Умуд бур, ва тагьаргу къулай хьуну, дуклаки оьрчIру ва махъсса цинявппагу цивппа аьдатсса оьрмулул кьаралданийн бучIанссар тIисса.
Бадрижамал Аьлиевал
