[dropcap]М[/dropcap]ахъсса ппурттуву щалагу билаятрай аваза бусса тагьар сакин шаврийн бувну, «Победа» авиакомпаниялул апрель зурул I-нния май зурул 3I-нийн бияннин дацIан дуршиву баян бунни самолетирттал рейсру.

Имара Саидова
«Билаятрай хъювуссулсса тагьар сакин шаврийн бувну, АьФ-лул Правительствалул хIукму бунни июнь зурул I-нийн бияннин аьрххирду чан баву ва миннуя чIумуйнусса махъаллил шаву. Жугу агьалинал цIуллу-цIакьшиву хьхьичI ххуттайн ларсун, му хIукмулуцIун бавкьуру.

[dropcap]Б[/dropcap]аян буллай буру цалсса апрель зурул I-нния майрал 3I-ннийн бияннин авиакомпаниялул рейсру чIумуйнусса дацIан дуршиву. Нажагьлий хьхьичIунмай билет­ру лавсун бикIминнангу личный кабинетрайхчIин арцурду махъуннай зана ритантIиссар. Ягу, авиакомпаниялул рейсру цIудуккан дурну махъ, аьрза чивчуну бюхъантIиссар цамур рейсрай ишла дан», — тIий бувчIин буллай бур компаниялул пресс-служба.

[dropcap]Ш[/dropcap]иккува бусан, МахIач­къалаллал АхIмадхан Султаннул цIанийсса аэропортрая «Победа» авиакомпаниялул самолетру лехлай дуссар Москавуллал «Внуково» ва Санкт-Петербургуллал «Пулково» аэропортирдайн.