КоронавирусрацIун бавхIуну, вай гьантрай жущалва хъана­хъисса цимурца лащан бан бучIир ттуруллавусса оьрмулуха: ттуруллаву кунма, гихунмай цичIав чIалай бакъа тIий жунма.

---

Гьай-гьай, цимурца чIу­муйнуссар. Ттурулливгу ппив хьунтIиссар, баргъгу аьч буккан­тIиссар, оьрмугу цила кьаралданийн зана бикIантIиссар, жувагу жунна аьдатсса оьрмулул тарглийн кIура баянтIиссару: щяикIансса кIану бакъа буцIин­тIиссар каферду, ресторанну, фитнес-клубру, салонну, ттучанну. Хъямала багьлантIиссару кувннайн кув, хьхьичIва кунма.

Амма ци даххана хьунтIиссар вания тихуннай жула оьрмулуву – личIантIиссарув жува бивкIсса куццуй ягу баххана хьунтIиссарув? КъакIулли.
Муния ихтилат бансса чIун ттигу хьхьичI дуссар, Ттурлу яла ларгукун. ЦIана тIурчарив, жува ихтилат банну, хар-хавар бакъа Ттуруллувун бакIрайн багьсса жула оьрму ссайну буцIин бантIиссарив.

Психолог хIисаврай, на хъирив бавцIуну бура, цукун къуццу тIий буссарив кьадарданул биялалийну, чарабакъашиву дакъа кьатIув бу­ккан къадагъа дурми, миннавух навагу. Му къадагъа мукссара бан-бит бакъассагу дакъар: дукиялул луртан дур, вил чIарав бур так вила гъанми, вин къакъулайсса чIумал хъамал букIлай бакъар. Бявххихху хьун телевизор ва интернетгу. Дарс лахьлан, зун бакъар. КутIану учин, бигьалаглагу винма ччикун.

Амма, ци бухьурчагу, къада­гъа дур къадагъа. ЧIявусса зат­ру къабучIину бур. Къадагъалий щябивкIун кIива-шанма гьантлува инсантал хьунабакьлай бур тIааьндакъашивурттащалгу: чIивисса затрайнгу хъювусул буклакаву, дакIнивун ццах багьлагьаву.

Цир бантIисса?
Бачияра пикри баннуча, жущава кувннан кувннал ци кумаг бан бюхъантIий бурив.
Чара бакъашиву дакъа кьатIув къабуккансса къадагъа даврил ялув на хIадур бав цаппарасса маслихIатру, цайми билаятирттал опыт ва соцсетирдавусса ттула хъирив лаявурттайн чул бивщуну.|

1. Ва тагьардануву вичIиди­шияра так официалсса информациялух! Бюхъайссар зу паччахIлугърал официалсса информациялийн вих хьун ччай къабикIан. Амма так мури дурагу дусса хIакьсса статистика.

2. Мавих хъанарду тIардайн. Цалчин, му ахIмакьшивур. КIил­чингу, миннул леххаву ва ццах бутлатиссар. Шамилчингу, зу зула оьрму буллалиссару цайминнал кIунттихьхьун. Му къатIайлассар. ГъалгъаматIру тIарду, аваза, леххаву рутлатиминнащал. Мабакьларду миннацIун. Аваза ва леххаву ччяни ппив шайссар. Щинзирданийх цинявннайн дияйссар технический­сса макьу.

3. Шаппаминнал цачIу ххал дувара хъярчийсса кинофильмру, кьинилун ца-ца. Мунил кумаг бантIиссар кулпатрал дянивсса ара паракьат дан, цачIунмай бан, ихтилатрайн бучIан.
4. ИчIува кушу бувара, зарядка дувара, лапва чурххайн гуж багьан къабивтун. БучIиссар къавтIун бизангу, бялахъангу. Биширдайн гуж бутан аьркинссар. Цила багьайкун шану къалахъарча, чурх курчIил шайссар. Гъан хъанай дур гъи. Муни чIалантIиссар зун зула чур­ххал хIал.

5. Оьнма буручала куну, цу­кунчIав къабучIиссар кьинилул ва хьхьунил кьарал лиян дан. Утту­бишияра цила чIумал, бизияра зува вардишсса чIумал. Шану цила багьайкун бияншиврул, бю­хъавай булуккияра дяхттасса чаннайн. ХIаят дакъахьурча, чIавахьулттичIа бацIияра.

6. Къулагъас дувара дукралухгу. Шаппа буруча куну, дукра чIяру мадувару, кумагран интернетгу дурча куну, нахIу-нахIусса дукрардахух лапва малагару.

7. ИчIуваминнащал столданий буккай тIуркIурдай буккияра. Мукунсса тIуркIурдал оьрчIру ва нину-ппу гъан байссар.

8. Дуклаки оьрчIал ва студентътурал дарс лахьхьаву кьамаритару. БучIиссар байбишин кьатIаллил билаятирттал мазру лахьлай, пишакарсса литература ккалай, онлайн-лекцияртту ва семинарду ххал буллай.
ДакI дарцIуну бура, ттул пикрир­дацIун ва масли­хIатирттацIун зула­ссагу ялун ххи хьунссар, къадагъалий шаппа щябивкIсса чIун мюнпатну гьан данссар тIий. Ялтту даркьу­сса Ттуруллува жува буккан аьркинссару баххана хьуну, ххуйшивурттайн, хъиншивурттайн кIункIу тIисса инсанталну. Буруччияра зула зува! Бурувччуну лякъиннав жува Занналгу.

Камилат Юнусова