[dropcap]М[/dropcap]ахъсса шиннардий, щалла дунияллий кунна, жучIарагу хъинну хьхьичIуннай хъанай дур психологиялул элму. Чан-чанну бухьурчагу, тIалав хъанай бур оьрмулуву психологтал. Амма, цайми билаятирттах бурувгун, дагъусттаннал агьлу бувар ттигу психологнал кумаграх мюхтаж буккан. Ци захIматсса тагьар ялун диярчагу, жунма тачIав дакIнийн къабагьай дакI дачIин психологначIан гьан. Мунал кIану жула оьрмулуву бугьай ссил, ссурахъил, архIал зузиминнал, чIаххувщарнил.
Зулайхат Тахакьаева
Амма, хар-хавар бакъа дунияллул ялун ливккунни оьсса бала, психологнал кумаг чара бакъа аьркинсса. Гьужум бувну ялун нанисса информация, дунияллий хъанахъимур лаласун захIматсса, хIакьмур ва къалпмур цанния ца личIи бан захIматсса.
[dropcap]И[/dropcap]нформациялул аралий зузисса журналистуран хаснува. Коронавирусрал инфекция сававну, даву гужлан дурсса аралувун СМИ-рдал сурсатругу багьлай бухьувкун, журналистурахь увкунни архния зун, яни шаппа-шаппа компьютердах. Зивугу дачIра дурхха тIисса пикрилий, шаппату даврийн бияннин чурххан аьркинсса мюхчаншивугу дуручлай, занан бивкIра даврийн.
Ахчинсса акъар, айлагансса акъар, хъунама редакторнал хъиривчу Руслан Къардашов ва на. ЛивчIми зий буссар шардату материаллу электрон почталийн тIайла дуклай. КIира кьини ларгунни цила кьаралданий. Шамилчинсса кьини тIурча, ттунма хIисав хьунна нава, ттуйва бияла бакъа, кабинетрал нуз вивхчил аьнт дуллай. Ца илгьам багьуннихха микку дакIнивун – щияра нигьа бусласисса? Кказит-журналлу итабакьай идаралувун лага-учIайсса кIиссурттай уккинукссавагу акъар. Коронавирусраятурав?
Укунмагу коронавирусрал аваза бувкния шинмай му гьарца кIанттайн ттущалва бусса кунма, антисептический затурдий ссуку дуллалаврил кабинетравусса гьарзат ссуссавай дур.
ХIасул хьунни пикри, цукун асар хъанай дурвав кьатIув къабуклакаву цайми инсантуран тIисса. Микку дакIнийн багьунни МахIачкъала шагьрулул 11-мур школалий психологну зузисса ттула шяравудуш – Аьппаслул душ Юнусова Камилат. Ванил хIадур бунни къадагъалий шаппа щябивкIсса «Илчилул» буккултрансса маслихIатру.
