Республикалул ХIукуматрал хъунама Артём Здунов ларгсса бигьалагай кьини хьунаавкьунни Роспотребнадзорданул Дагъусттаннал управлениялул хъунама Николай Павловлущал.
П. Рамазанова
Ххал бивгьунни коронавирусрал азар ппив хьун къаритаву мурадрайсса ххуллурду-чаранну. Хъунмур къулагъас дунни общепитрал масъаларттах ва медикаментирттал дузалшиннах, вирусрал пандемиялул тагьардануцIун бавхIусса, Аьрасатнал Президентнал ва Дагъусттаннал БакIчинал указру биттур буваврих. Хъинчулий ккарккунни вай гьантрай ургала акъасса, цивппалусса бугьараминначIан дуканмур, аьркинмур диян дуллалисса волонтёртурал давугу.
Республикалул хъунама санитар хIакин Николай Павловлул кIицI лавгунни, цимурца хIисавравун лавсун, уртакьну зий бушиву хIакинталгу, хасъсса структурардал зузалтгу. Ва хьунабакьаврий гьуртту хьунни цалчинма вице-премьер Анатолий Карибовгу.
