[dropcap]М[/dropcap]арт зурул 24-нний «Дагестан» РИА-лул редакциялий «Открытая власть» проектрал лагрулийсса ирглийсса пресс-конференция хьунни,
ва ххуллух ДР-лул туризмалул ва халкьуннал художествалул промыслирдал министр Расул Ибрагьимовлущал.
Имара Саидова
Расул Ибрагьимовлул балжину бувсунни республикалийсса туризмалул тагьардания ва гихуннай дуллантIисса давурттая.
— ХIадурну буссару региондалий турсезон дайдишин. Республикалул туризм хьхьичIуннай хъанай най душиву чIалай бур жучIанма чIявусса туристал чил билаятирттаягу занай бушиврийну.
Махъсса ппурттуву, щала билаятрайсса коронавирусрацIун дархIусса нигьачIийсса тагьар душиврийн бувну, чIумуйнусса ларкьуну дур билаятирттал дянивсса дазурду.
Мунийн бувну ххишаласса чIурчIав дуллай буру республикалул вивсса туризмалул маршрутру хъиннура къулай даврих, — увкунни Расул Ибрагьимовлул.
Ванал кIицI лавгунни цIанакул Дагъусттаннай яла машгьурми туризмалул объектруну бушиву Нарын-Къала, «Сары-кум» бархан, Сулакьрайсса каньон, Хъунзахъиял жюружани, Ялувмур Гъунивсса ва Бухмур КахIибливсса къаларду. Му бакъассагу, бувсунни цIанакул республикалийн бувкIсса туристуран ккаккан дувансса ихтиярду ларсъсса 42 турмаршрут душиву.
— Республикалийсса туризмалул отраслирду чIярусса дуссар. Хъинну машгьурну дур авчитурал (сурат рищаврилмургу), балугъру бугьаврил ва тIабиаьт ххираминнан чятирду бивщуну бигьалагайсса турду.
Туризмалул цинярда объектру ххал дан ва бигьану лякъин бюхъайссар «2 ГИС» карталийхчIин ва «Дагтуризм» приложениялийхчIин, — увкунни ванал.
Каялувчинал бувсунни туризмалул ведомствалул дуршиву цикссагу фестиваллу, выставкарду-ярмаркарду.
Так ца «Визит в Дагестан» тIисса фестивальданийн Дагъусттаннайн увкIун ур Европанал 16-хъул хIукуматирттаясса 150 гьурттучи. Аьмну вай цинярда мероприятиярттайн Аьрасатнал регионная ва чил билаятирттая Дагъусттаннайн увкIун ур 190 азара инсан.
Щала билаятрайх Дагъусттаннал культура, халкьуннал багьу-бизу машгьур бувссар «НТВ», «Звезда», «Россия», «Russia Today», «1 канал», «Моя планета» ва цаймигу телеканаллал журналистурал ларсъсса кинордалгу.
