Бакрил душ
Кьурбанова ПатIима

Март зурул 30-нний, лавмартсса цIуцIаврища ххассал къавхьуну, щалва агьлу-авладгу къума-банд лаган бувну кьабивтун, лавгунни дунияллия Цалчинмур 

ЦIувкIратусса ххаллилсса хъамитайпа, Дагъусттаннал здравоохранениялул отличник, Бакрил душ Кьурбанова ПатIима.

Ва Ккуллал райондалул жяматрангу, лакрал миллат­рангу ххуйну кIулсса Бакриев Бакрил – РСФСР-данул халкьуннал учительнал чIивимур душри.
Бувссар ПатIима 1971 шинал ЦIувкIрав, буттал шяраву школагу къуртал бувну, дуклан бувхссар Пятигорскалийсса фармацевтиялул институтравун, провизорнал пиша лахьхьин. Зий буссия Дагъусттаннал Минздраврал Аптекардал управлениялий отделданул хъунмурну.

2007 шинал ПатIима «Шинал хьхьичIунма хIакин» конкурсрай «Яла хьхьичIунма провизор» номинациялий ххув хьу­ссия. Республикалул агьалинал цIуллу-сагъшиву дуруччаврил давриву ПатIимал чIиви-хъунсса бутIа бушиврул кьиматран ванин дуллуну дур, кIай ялув кIицI лавгсса бусравсса цIардацIун, цаймигу сийлийсса наградар­тту. Бакрихъал ПатIима буссия дакI-аьмал хъинсса, гьар ишираву итххявхсса, халкьуннал учайсса куццуй, бавцIусса кIану ххуй бувайсса хъамитайпа. Ласнащал, МахIаммадлущал, тарбия буллай буссия кIива душ ва чIивисса арс.

[dropcap]В[/dropcap]а духIан захIматсса кьур­ч­Iишиву кIидачIлай, жижара буллай буру ПатIимал ласнахь, МахIаммадлухь, душваврахь, арснахь, уссурваврахь, ссурваврахь, цинявгу гъан-маччацириннахь. Аллагьу Тааьланал ссавур дулуннав цинявн­нахьхьун! ПатIиман къабуллумур оьрмулул бутIа аьнтIикIа душвавран ва арснан ххибувну лякъиннав, цуппагу алжаннул ххари буваннав, гьаттай нур дизаннав!

1-мур ЦIувкIуллал жямат

---

АВьДУЛЛАГЬЛУЛ ДУШ
МАХIАММАДОВА АСИЯТ

Март зурул 27-нний, нюжмар кьини, дахьва интнийнгу бувккун, тIабиаьтгу тIутIайх дичлачисса чIумал, оьрмулул 87 шинаву, аьпалухьхьун лавгунни уздансса зунттал хъамитайпа, Кьукуннал шяраватусса МахIаммадова Асият Аьвдуллагьлул душ.

Асият бувну бур 1933 шинал ххаллилсса дин-чаклил заллу Щурпахъал Аьвдуллагьлул ва Нинул кулпатраву. ЧIавания шинмай Асият захIмат буллай бивкIун бур Кьукуннал колхозрал личIи-личIисса давурттай.

1963-кусса шинал ласнащал, МихIаммадлущал, бивзун, ялапар хъанай буссия Узбакисттаннай, Денау шагьрулий, мунияр махъ, ххуйсса къатта-къушгу бувну, зана бивкIссия МахIачкъалалийн.
Асият буссия аьмал-хIал бавкьусса, цила лагма-ялттунал дакIру ххари дуллалисса, хъинну хъамалгу, бухху-буккугу ххира­сса, тIивтIунмасса ссупрагу къатлува чан къабайсса инсан.
Асиятлул ва МихIаммадлул, хъуни бувну, ччаннай бацIан бувссар кIия арс ва кIива душ. Амма ккухIин багьссар хар-хавар бакъа, авария хьуну, оьрмулуцIа хьусса, цила буттан цIа дирзсса, арснал дардгу. Пикрирдайнма бикIайссия нигьачIийсса даврий, Дагъусттаннал виваллил иширттал министрну, зузисса арс Аьвдурашидлуяту.

Асият жуятува личIи шаврил кьурчIишиву дакIнийхтуну кIидачIлай, жижара буллай буру арснахь Аьвдурашидлухь, душваврахь – Гьидаятлух ва Савдатлухь, ссил оьрчIахь, оьрчIал оьрчIахь ва махъсса цинявппагу гъан-маччаминнахь. Зу­хьхьун цIуллушиву дулуннав, оьрмурдай барачат бишиннав, кьурчIишиву лагь дансса ххаришиву ялун дияннав!
Асиятлулгу бунагьир­ттал аьпа баннав, рухI куклуний дишиннав, гьав нурданул дуцIиннав, алжан нясив баннав!

Ва кьурчIишиву кIидачIин бувкIун, чIарав бавцIусса цинявннахьвагу Кьукуннал жяматрал чулухату хъунмасса барчаллагь тIий буру. Зул аьрххи-ххуллу ххаринийн, хъиншивурттайн бакъа нясив къабаннав.

Кьукуннал жяматрал
чулуха Нурислан Хавчаев