Дия Хъунмасса Буттал кIанттул цIанийсса дяъви къуртал хьусса шинну. Дяъвилия зана къавхьуминнал кIантту бугьлай бия дяъвилул оьрчIал. Ттул бутта МахIаммад-хIажи ия ца ччаннал мушакъатсса. Хъунама уссу Расул зий ия Изберграй,
чIавама ХIусайн – Каспийскалий. КIива ссу, Мяи ва Ххадижат, бия мюрщину. Нину Ссапижат дяхтта къурнил даврий, хьхьурай майлул чирахърахун тIахIунттив дуллай дикIайва.
Ца кьини буттал гьан бувра тIахIунттив даххан ттуккуй Гъумукун базаллувун. Хьхьувай ххуллийх буссияв, кIюрххил – базаллуву. Даххаймургу дарххуну, шаппайн бачин хIадур хьура. Парачив ттуккуй бишиннин бурчул уссаву къюллу бакьин буллай бунува, ссавнийх даркьур ттурлу, дяхтта цIан ларкьуну, бувтIури чявхъагу. Янилусса ттукку бакъа хьури, лагмасса базар ххит хьури. Хъун парачив мукьахну бувкра щала Гъумукух. Ттуккух луглай бунува, гъаралгу духларгун, дуниял чанна хьури.
Ца пуланнал увкуна мукун занай пайда цири, ина Бархъаллал Ажублухь оьвчин ува куну. Лякъав Бархъаллал Ххамислул къатта, бувхра хIаятравун. Лявкъунни Ххамисгу, Шагьунгу аьтIий багьну, дуниял духларгун.
— Зун хьумур цири, ссай аьтIиссару?
— АьтIий буру, АстIу-мямма ухлавгун уну!
— Яр, АстIу-мямма цури?
— Сталин-Мямма! Сталин-Мямма! — леххаву кур Ххамислул.
АьтIий дував нагу ца ссят, дурхьунссия ххишалагу, аьтIий буссияв ттулва ттуккуйгу. Ттула мурадгу бусав. Ажубгу лявкъуна, бакIуя оьгу-оьвкуна:
— ВичIидишара, лакрал мюрщи щархъурдал жямат! Агу-агуласса, чал али-кIилигу дусса, ттуруну рангсса, бархъалащарнил ттукку базаллува нанисса зулва ттукращал бувкIун бухьурча, тавакъюри махъунмай зана баву, пишкашрангу дихьлай бур мукьра къуруш!
[dropcap]М[/dropcap]у хьхьуну ливчIра Ххамисхъанний, ккаркри макIгу. ВацIлува най ур ца адамина, хъарай хъуннасса рикIиращал. Ттул чIарав ивукун, увкури: «Вил ттуккул бакI рутав, нава бавцушиву кIул къахьуншиврул», — куну.
Хъирив кьини бувкIра Бархъарав. ЛичIав буттахь жулва ттуккул, макIгу.
— Агь, вил къаттай, бакъассар жулва ттукку! — кури буттал.
Нарив танияр махъгу ца ттуккул, ца ккацлул ахир дав – буттан арсну бикIаншиврул.
Чивчуссар Удил арс
Кьаландаров Кьаландардул,
ш. Бархъал
