«Эхо Дагестана» тIисса инстаграм сообществалий дурккунни Ккуллал шяраваллил бакIчи шяраву дезинфекциялул давуртту дуллалисса
видео ва мунищала цамургу – дезинфекция дурну махъ шяраву ичIаллил лелуххант ливтIуну бур тIисса.
Зулайхат Тахакьаева
[dropcap]В[/dropcap]а иширал ялув жу оьвчарду шяраваллил бакIчи Рамазан Аьлиевлуйн. Ванал бувсунни цува, мяйжаннугу, дезинфекциялул давуртту дуллай ивкIшиву ттучаннал лагма-ялттусса кIанттурдай. Дезинфекция дангу ишла бувшиву райондалул администрациялул гьарца шяраваллан буллусса ампуларду.
[dropcap]В[/dropcap]идеолул автор ХIасан Аьлиевлул бувсунни шяраваллил бакIчи дезинфекция дуллалисса видео цала кIулминначIан гьан дурну махъ му цIана соцсетирдаву ппив хьушиву аьнакIив ливтIуну бур тIисса цамур видеогу.
— Ккулув цавагу къуш бакъар ичIаллил лелуххант къаябуллалисса. Амма ливтIуну бур анжагъ ца къушлий. Дезинфекциялул давуртту къадурсса чIумалгу чан къашай ливтIусса аьнакIив, лелуххант. Ва базилухгу аьнакIив литIунсса багьана дезинфекциялул давуртту хьусса ххай акъара. Бюхъайхха тIахIни-кIичIу шюршусса щинава ци-дунугу дирирну дикIан ягу ттукI бивщуну ливтIуну бикIан. Мукунссагу сававртту шайшиву кIулну, аьнакIал залуннал цила аварагума къадурунни, — тIий ур ХIасан.
