Шаэр, чичу, публицист

[dropcap]М[/dropcap]артрал 17-нний, МахIачкъалалив, Р. ХIамзатовлул цIанийсса Национал биб­лиотекалий хьунни «ЦIубарз» журналданул редактор Хизри Илиясовлул юбилейран

хас дурсса вечер. Шиккура хьунни «Литературалул камертон» тIисса цIуну бувксса луттирал презентациягу.


Хизри барча ан бувкIминнавух бия аьлимтал, чичулт, жяматий­сса ишккаккулт, артистал, журналис­тал, учительтал. Ванал кьини хъун дан бувкIун бия шяраваллил жямат, гъан-маччами, хIасил, Хизрил хIурмат буми, ванал творчество ххирами. Мажлис бачин бувну ия Дагъусттаннал Чичулт­рал союзрал председатель МахIаммад АхIмадов.

Андриана Аьбдуллаева
Гьашину Хизрин бартлаглай дур оьр­мулул 60 шин. Амма дуруцири давур­ттал, итабавкьуцири луттирдал, ларсъцири цIардал хIисав дуллалийни, ванал кIилий ххишаласса оьрму бувтсса ххан­ссар. Иминну пишгу тIий, ссаятурив намус буллалисса куна лагьсса чIуний гъалгъа тIутIисса Хизри ккавкнал щилчIав къаучинтIиссар ва философиялул ва филологиялул элмурдал докторди куну.

«ДР-лул культуралул лайкь хьу­сса ишккакку», А. С. Грибоедовлул цIанийсса Мусил медальданул лауреат, Имам Шамиллул мусил медальданул кавалер. ДР-лул ХIукуматрал ванан дуллуну дур «За любовь к родной земле» тIисса ордендалул медаль. Мусил медаллая тIун бивкIнавхьур, шиккува кIицI бан, школагу жула юбилярнал мусил медальданий къуртал бувну бур.

Увну ур Хизри 1960-ку шинал Лакрал райондалийсса Ппалассуннал шяраву, урчIва оьрчI бусса хъунмасса кулпатраву. Ванал ппу Илияс чIярусса шиннардий колхозраву механизаторну зий ивкIун ур, Нину Аминат зий бивкIун бур клубрал хъунмурну. Сангардал школа къуртал бувну махъ, цаппара шиннардий луттирду итабакьайсса издательствалийгу зий ивкIун, 1982 шинал увххун ур М. Горькийл цIанийсса Литературалул институтравун.

[dropcap]М[/dropcap]унияр махъ зий ивкIун ур личIи-личIисса давурттай. Дагъусттаннал луттирду итабакьай издательствалий, «ЧIавалачин» журналданул редакторну. ХIакьину зий ур «ЦIубарз» журналданул редакторну.
Хизрил кIунттила ттинин бувккун бур ацIвахъул луттирду: прозалул, поэзиялул, публицистикалул, чирчуну дур чIярусса элмийсса монографияртту. Шиккува кIицI лаган, Хизрил цакуццуй усттарну чичай кIивагу мазрай – лакку мазрай ва оьрус мазрай.

Ва кьини Хизри Ильясовлул оьрмулия ва творчествалия бусласисса, ванацIун бавхIусса ишру дакIнийн бичлачисса ихтилатру бунни: Ветерантурал советрал хъунаманал хъиривчу Сиражуттин Илиясовлул, Халкьуннал Мажлисрал председательнал хъиривчу Камил Давдиевлул, Дагъусттаннал Жяматийсса Палаталул хъунаманал хъиривчу Сапарбаг Аьбдуллаевлул, Дагъусттаннал университетрал муаьллим Ххазина Аминовал, «Илчи» кказитрал хъунама редактор Руслан Башаевлул, Дагъусттаннал Музыкантътурал союзрал председатель Хан Башировлул.

Дагъусттаннал чичултрал союзрал Лакрал секциялул председатель Илияс МахIаммадовлул, Аьрасатнал ва Да­гъусттаннал халкьуннал артист Айгум Айгумовлул, МахIачкъала шагьрулул хъунисриннал советрал председатель Оьмар Беговлул, Лакрал театрданул режиссер Аслан МахIаммадовлул, Чапаевкаллал школалул директор Камил Аьлиевлул, искусствовед Мариян Чалабовал, чичу Казбек Мазаевлул, дагъус­ттаннал халкьуннал чичу Сугъури Увайсовлул ва м.ц. Ихтилатру бунни мукунма Ппалассуннал шяраваллил жяматраясса вакилтуралгу.
Ва кьини юбилярнан дунни дакIний личIансса наградартту, дунни бахшишру.

Ихтилатирттал лях-карах дуклаки оьрчIал бувккунни Хизрил шеърирдугу. Мажлис чIюлу бунни МухIсин Камаловлул, Жанна Кьурбановал, Тамара Закарьяевал, Халисат Батырбековал ва Рамил КьурбанмахIаммадовлул балайрдал.
Ахирданий юбилярнал барчаллагь увкунни цала кьини хъун дан бувкIминнахь.
Цинявппагу мажлисрай гьуртту хьун бувкIминнан авторнал бахшиш бунни цIуну бувксса цала лу.