Жура-журасса ххуйшивуртту

Ларгсса хамискьини МахIач­къалаллал 18 школалий хьунни Педагогтурал идеяр­ттал фестивальданул лагрулий­сса мероприятияртту. Ванил сакиншинна дурну дия ДР-лул КIулшивуртту дулаврил ва элмулул министерствалул.


Залму АьбдурахIманова
Аьдатрайн бувну хъуншагьрулул 11-мур лицейрал майданнив ва кьини «Миллатир­ттал культура, тарих ва аьдат-эбадатру дуруччавриву ниттил мазрал бугьлагьисса агьамсса кIану» тIисса цIанилусса шадлугъ хьунни. Яргну щурущи бувну бия шикку республикалул 13 миллатрал майданну. ЛяличIину нахIуну ва тIааьнну бия жула миллатралмур майдангу: щайини, аьрайнгьав­ккури, бакъухъ, хьамаран дирзун нанисса дукьрахIан, ккуллал къячIив, лакку буркив ва хьхьахьхьари.

Тамашалун дирхьуну дия хIакьинусса багьу-бизулуву жура сайки ишла къадайсса тIахIунттив, варакъи-гунгунтту, ппал дюххай къатIа, зукка, каних щаршсса ххуржинтту, хъаттирду ва цаймигу затру. Майданнив циняв лагма лавгун, хъамал кьамул буллай бия Каспийскаллал, МахIачкъалаллал ва ЦIуминалийсса ЦIуссалакрал райондалул школардай ла­кку мазрал дарсру дихьлахьисса учительтал ва лакрал «Къиссу» къавтIаврищал бувкIсса хъуншагьрулул 36-мур школалул дуклаки душру.

Циняв учительтал миллатирттал лаххи-ликкиялуву, бакIрайн чалагъайрттугу дирчуну, дуллалисса шадлугъран лайкьну чIалай бия.
Шиккун бувкIсса хъамал кьамул буллай бия хъуншагьрулул 11-мур лицейрал директор Ккурккуллал шяравасса Зугьра Дибирова бакIчисса щала коллектив. Зухра Дибирова Респуб­ликалул ниттил мазурдил учительтурал ассоциациялул каялувчигу бухьувкун, ванийсса жаваблувшиннагу хъуннасса дия.

Хъамаллуравух бия А.Тахо-Годил цIанийсса ДНИИП-рал директорнан кIанайсса Мисиду Щурпаева, ДР-лул КIулшивуртту дулаврил министерствалул, хъуншагьрулул КIулшивуртту дулаврил управлениялул, ДГУ-лул ва ДГПУ-лул вакилтал, шаэртал ва жяматий­сса ишккаккулт.
Миллатирттал майданнайх бувккун махъ циняв бавтIуна школалул хъунмур залданувун. БатIаву тIитIлай, З. Дибировал, циняв барчагу бувну, Ни­ттил мазрал учительтурал ассоциациялул чулуха барчаллагь куна ва даву дан дакIнийн багьминнахь.

Барчаллагьрал чагъардугу буллуну, ассоциациялуву хъуннасса даву дуллалаврихлу ванил барчаллагьру баян бувна миллатрал мазрал учительтурал модератортурайн. Вайннавух бия ниттил мазрайн дагьайсса циняр мероприятияр­ттай чялишну гьуртту шайсса, МахIачкъалаллал 16-мур школалий лакку мазрал дарсру дихьлахьисса ПатIимат Аьлиевагу.
Хъирив хъамаллуран лицейрал дуклаки оьрчIал хIадур дур­сса хъун дакъасса концерт кка­ккан дуруна.

Учительтурал дирхьуна да­гъусттаннал мазурдийсса тIиртIу дарсру. МухIуттин Чариновлул оьрмулул ххуллун ва творчествалун хас дурсса дарс дирхьуна ЦIуминалийсса Шушиннал школалул учитель Умамат Багъирчаевал.