[dropcap]М[/dropcap]артрай 26-нний Дагъусттаннал БакIчи Владимир Васильев гьуртту хьунни ДР-лул Халкьуннал Мажлисрал 45-мур сессиялий. Му бачин бувну ия парламентрал председатель Хизри Шихсаэдов.
Сессиялий ДР-лул МВД-лул 2019 шиналсса давурттал хIакъираву махъ лавхъунни республикалул виваллил иширттал министр Аьбдурашид МахIаммадовлул. Мунал ихтилатрая махъ «Единая Россия» партиялул чулухасса депутат ОьмархIажи Аьлиевлул тавакъю бунни ивкIусса низам дуруччаврил зузалал щащар, Дарбантлиясса Сафибе Умарован кумаг буван. Ихтилатчинал тIимунийну, му хъамитайпалул лас ивкIуну 10 шин хьунугу, мунин къатта булун ттигу бувар. Му информациялул хIакъираву Владимир Васильевлул увкунни: «Барчаллагь, му куццуй инсаннай дакI цIуцIисса депутатътал бушиврухлу. ЦIанасса ппурттуву Конституциялий гьарза дуллай бур парламентрал ихтиярду. Жура ми ишла дуллангу аьркинссар багьайсса куццуй, закондалия арх къабувцун.
[dropcap]М[/dropcap]у хъамитайпалул масъалагу дузал буванну, агарда му мяйжансса бухьурча».
Депутатътурал суал буллунни ДР-лул ХIукуматрал Председатель Артем Здунов тамансса хIаллай даврий акъашиврул хIакъираву. Мунил сававрал хIакъираву Дагъусттаннал БакIчинал бувсунни цIанасса ппурттуву му манзилданий (дистанционно) зий ушиву.
Владимир Васильевлул тIимунийну, Артем Здунов лавгун ур 2 нюжмардийсса отпускалий. Яла му кулпатращал архIал лавгун ивкIун ур цамур билаятрайн, гьамин му чIумал чIуруну диркIун дур коронавирусрацIунсса тагьар тих. Мунияту цIана му усса ур шава зий. Ва зурул 28-нний къуртал хъанай дур мунал манзилданий зузисса чIун.
Сессиялий ххал бивгьунни цаймигу масъалартту.
