Лакку маз ва тарих ххуйну кIулминнан – бахшишру

Лакку маз ва тарих ххуйну кIулминнан – бахшишру

Февральданул 21-нний щаллагу дунияллий кIицI лагайсса Ниттил мазрал кьинилун хасну МахIачкъалалив Дусшиврул

къатлуву хьусса Лакку мазрал байрандалий барча бувна муниннин баян бувну бивкIсса Лакку мазрайсса назмурду дуккаврил ва «Дагъусттаннал тарих цIулаган баву» тIисса тарихрал конкурсирттай хьхьичIун ливчуми.


Бадрижамал Аьлиева
Шанма барз ва чIаравсса хьуссия вай конкурсру най, инстаграмравусса Лакрал жагьилтурал ккурандалул лажиндарай лакку мазрай назмурду ккалаккиминнал (2-3 шинну хьу­сса мюрщултрая байбивхьуну, оьрмулул 80-ллихъайсса шинну хьуминнайн бияннин) видеорду ххал дуллай, лайкру бихьлай, комментарияртту чичлай.

Лакрал жагьилтурал ккурандалул сакин дурсса Лакку мазрал байрандалий Дусшиврул къатлул сахIналийн, хъин-хъинсса ихтилатругу бувну, конкурсирттай ххув хьуминнан бахшишру дулун лавхъуна бусрав­сса хъамал.

Лакку мазрай назмурду ду­ккаврил конкурсрал оьрмулул 16 шинавун биян бувами гьур­тту хъанахъисса мюрщултрал ва оьр­мулул чIаваминнал дянив цалчинсса кIану бувгьусса Якутс­калий ялапар хъанахъи­сса Валиаьвдуллагь Къапиевлун (ш. ЦIуссалак), кIилчинсса кIану бувгьусса оьрмулул 2 шинаву­сса Шуаьна Ургъуеван (ш. Ккул) ва шамилчинсса кIану бувгьу­сса 5 шинавусса Мадина Мутаеван (ш. Ккул) бахшишру дуллуна Лакрал райондалул администрациялул бакIчи Юсуп МахIаммадовлул.

Оьрмулул 16 шинава 35 шинавун бияннинсса жагьилтуралмур номинациялий цалчинсса кIану бувгьусса Марзижат Аьбдуллаеван (ш. Гъази-Гъумучи), кIилчинсса кIану бувгьусса Малик Кьурбановлун (ш. Бурши) ва шамилчинсса кIану бувгьусса АхIмад Кудаевлун (ш. Гьамиящи) бахшишру дуллуна Ккуллал райондалул администрациялул бакIчи Шамил Рамазановлул.

Ва конкурсрал «35 + » номинациялий цалчинмур кIану бувгьусса оьрмулул 70 шинавусса Аьйшат Оьмариеван (ш. Ккул), кIилчинсса кIану бувгьусса 37 шинавусса Ума МахIаммадован (ш. Къян) ва шамилчинмур кIану бувгьусса 83 шинаву­сса Ххадижат Абдалован (ш. КIилчинмур ЦIувкIул) бахшишру дулун сахIналийн лавхъуна ЦIуссалакрал райондалул администрациялул аппаратрал каялувчи СултIанат ЦунтIаева.

Конкурсрай гьуртту хьу­сса оьрмулул яла чIавама ва яла угьарама гьурттучинан бахшишру дулун сахIналийн бувккуна «Дараччи» хъаннил клубрал президент Гульшан Хасаева. Ванил оьрмулул 2 шинавусса Шуаьна Ургъуеван ва 83 шинавусса Ххадижат Абдалован цилла каялувшиву дуллалисса клубрал чулуха луттирду ва арцуйнусса бахшишру дуллуна.
«Дагъусттаннал тарих цIу­лаган баву» конкурсрал цалчинмур номинациялий цалчин­сса кIану бувгьусса Муслим Загьировлун (ш. Хъусращи) бахшиш дуллуна Дагъусттаннал РувхIанийсса управлениялул КIулшиву дулаврил отделданул начальник МухIаммад Ссаламовлул.

Тарихрал конкурсрал кIил­чинмур номинациялий цалчинсса кIану бувгьусса МахIай Ибрагьимовлун (ш. СумбатIул), кIилчинсса кIану бувгьусса Аьвдуллагь Маммаевлун (ш. Шахьуйми), шамилчинсса кIану бувгьусса Рукьижат МахIаммадован (ш. Мукьар) бахшишру дуллуна МахIачкъала шагьрулул Кировский райондалул хъунама СалихI Сагидовлул.
Конкурсрал шамилчинмур номинациялий ххув хьусса Рая Аьлишаеван (ш. ЧIурттащи), МахIаммадхан МахIмудиевлун (ш. Вихьул), Диана Ажуеван (ш. ГьунчIукьатIи) бахшишру дуллуна тарихчи Исмяил Аьлиев­лул.

Щак бакъа, уку-укунсса конкурсиртталгу хъуннасса даву дуллалиссар ниттил маз ябавриву, му, буттахъая, буттал бу­ттахъая жуйнма бивсса кунма, хъиривсса никирттайнгу биян бавриву. Гьарца давриву кунма, бюхъай шиккугу бикIан лях лавгсса, щаллу къавхьу­сса кIанттурду. Ца ххуллух щаллу къавхьумургу цалнияр цал ус­ттар буллай, ниттил маз ла­хьхьавриву, хъамабитан къабитавриву хъунмасса хIарачат буллай, уку-укунсса байранну ва конкурсру буллай зий бур Давуд Амировлул каялувшиндаралусса «Лакрал жагьилтурал ккурандалул» оьрчIру ва душру.
ТIайлабацIу баннав зун, лак­рал жагьилтал!

Читайте также: