Къалещаннав зуву даврихсса шавкьгу, гьавасгу

Къалещаннав зуву даврихсса шавкьгу, гьавасгу

ХIурмат бусса культуралул зузалт, ветерантал!
ДакIнихтуну барча тIий бура зухь пишалул байран. ЧIа тIий бура зун бигьа дакъасса, жяматран бусравсса давриву тIайлабацIу. ЛяличIинува барча бан ччива ва кьини жула ЦIуссалакрал райондалул культуралул зузалт.

ЦIуссалакрал райондалул Культуралул управлениялул зузалт­ралгу хъунмасса захIматрал бутIа бивхьуссар жула культура хьхьичIуннай дан, республикалул культуралул тарих авадан бан.
ХIакьинусса кьини райондалул культуралул управлениялувун бухлай бур райондалийсса Культуралул центр ва 13 филиал. Вайннува шанма филиал бур ЦIуссаминалий.

«Дараччи» тIисса райондалул самодеятельностьрал коллективрал ва М. Чариновлул цIанийсса театрданул, райондалул, респуб­ликалул ва дунияллул халкьуннал дянивсса конкурсирттай ва фестиваллай гьуртту хьуну, мудангу хьхьичIунсса кIанттурду бугьайссар.
Ларгсса шин райондалул культуралул идарарттан даркьусса хьунни. Дан бювхъунни чIярусса давуртту.

ЦIуссалакрал райондалул Культуралул ва бигьалагай центр­данул сакин дур­ссар личIи-личIисса выставкар­ду, субботникру, акциярду ва байраннацIун дархIусса агьам­сса мероприятиярду.
Ялун нанисса ник Ватан ххирану тарбия шаву мурадрай, сайки цинярдагу шяраваллаву кIицI ларгссар «Авгъанисттан дакIния къабуккайссар»», «Къучагътуран бивкIу бакъассар», «Зузияра, уссурвал» цIанилусса мероприятияртту. Мукунна Центрданул хIадур дурссар «ОьрчIру жула бучIантIимурди» тIисса программа.
Райондалул Культуралул управлениялул зузалт гьуртту шайссар райондалий дуллалисса цинярдагу мероприятиярттай.

Культуралул ва бигьалагрулул центрданул сипталий дур­сса «ОьрчIшиву – дакьавур ва ххаришивур» тIисса акциялий гьурттушинна дурссар щалагу райондалул агьалинал.
Ялун бурувгун, чIявуминнан бикIай культуралул зузалт балай тIий, къавтIий, байраннай оьрму бутлатисса кунма чIалай. Так нажагьссаннан кIулли цуксса хъунмасса захIмат бихьлахьиссарив ва цуксса агьамсса даву дуллалиссарив, буххаву-бавчIаву къакIулсса, культуралул зузалтрал.

Райондалул Культуралул управлениялул зузалтращал ттун кIицI лаган ччива агьамсса даву дуллалисса цинявппагу ЦБС-рал зузалтгу. ЛяличIинура кIицI лаган ччива шяраваллал библиотекарттаву мюрщи оьрчIащал дуллалисса тарбиялул давуртту. Вайннал хIарачатрайну хьунни цикссагу конкурсру, викторинарду, конференциярду, лу­ттирдал выставкартту. Къавхьунни цавагу идаралул даврий аьй дансса кIану. Цал ттигу барча зул байран, жул даврил уртакьтал! Зуву тачIав къалещаннав зула даврихсса шавкьгу, гьавасгу.

ХIабибат Буттаева, ЦIуссалакрал райондалул Культуралул управлениялул хъунмур

Читайте также: