Ккуллал райондалиясса хаварду

Ккуллал райондалиясса хаварду

Ккуллал библиотекалий

Шикку хьунни ниттил мазрал кьинилуцIун бавхIусса мажлис. Библиотекалул каялувчи ХIажиева Аьйшал бувсуна ва кьини ккаккан дурну диркIшиву ЮНЕСКО-лул 1999-ку шинал, дунияллийсса мазру чан хьун къабитаврицIунсса ниятрай.

Аьрасатнаву ва кьини кIицI лаглан бивкIун бур 2000-ку шиная шиннай. Ниттил маз ябаврил цIанийсса бюххансса ихтилат бувна ниттил мазрал учительница Далиева Гугьаршал. Дуклаки оьрчIал бувккуна лакку мазрайсса шеърирду. «Дунияллийсса мюрщи миллатирттал мазру бухлаглагисса буслай бухьувкун, жува ццах увкуну бикIан аьркинссару ниттил маз бухлаган бюхъаврил ялув», — тIисса бия агьамми пикрирду.

Вихьуллал
культуралул къатлуву
Шикку хьунни Авгъаннава жула аьрал бувксса кьинилун ва Ватан дуруччултрал кьинилун хас дурсса хьунабакьавуртту ва мажлисру. Ми­кку гьуртту хъанай бия шяраваллил жямат, дуклаки оьрчIру ва учительтал. ЖучIавату дяъвирду арх баннав, ссав чаннанура личIаннав тIисса дия ихтилатирттал мяъна.

Орел шагьрулиясса хъамал
Февраль зурул 18-нний Ккуллал райондалийн ув­кIун ия Буттал кIанттул цIа­нийсса дяъвилий жанну кьурван дурминнал хъирив буклакисса Орел шагьрулул следопытътурал каялувчи Николай Красиков. Ва хьунаавкьуна райондалул бакIчинал хъиривма ХIусманов Ажувлущал ва жяматийсса ишккаккултращал. Красиковлул бувсуна цува, цала улк­луйсса Фетищива ва Кривцово тIисса шяраваллачIа хьусса талатавриву жанну кьурван дурсса инсантал часса бивкIссарив кIул буллай, хъирив излай ушиву. Тай цивппагу тикку аьмсса гьаттаву бувччуну бусса бия. Ванащал райондалийн бувкIун бия дяъвилий жанну дуллуми ххал бигьлагьисса ХIабиб МахIаммадов ва АхIмад-Хан Султаннул фондрал председатель Лаура Кьурбанова. Икьрал дуруна цачIуну зун.

ХIажимурад ХIусайнов

Читайте также: