[dropcap]Я[/dropcap]нварьданул 18-нний «Дагестан» РИА-лий хьунни ДР-лул цIуллу-сагъшиву дуруччаврил министр Жамалуттин ХIажиибрагьимовлул пресс-конференция.
Залму АьбдурахIманова
Ванал бусаврийну, 2020 шинал жула республикалул «ЦIуллу-сагъшиву» тIисса нацпроектрал лагрулий 6 шинай дансса давурттан сайки 20 миллиард къурушрал ккаккан бувну бур харж бан. Вайннува гьашину харж бантIий бур 5 миллиард, дукIумур шинал харж бувну бивкIссар 3,4 миллиард. Министрнал кIицI бунни Дагъусттан гьурттуну бушиву регионнай щурущи дурсса 7 журалийсса цIуллу-сагъшиврул проектравух.
ХъунмурчIин каширдугу, къулагъасгу ххи дурну дур онкологиялул, къюкIлил ва туннурдал азардах. Къулагъасралува бикIантIисса ца ялагу агьаммур масъалану бур дахьва бувсса оьрчIру бакI буккан баврил ялув бавцIуну бикIантIимур масъалагу. Мисалдаран, ларгмур шинал Дагъусттаннай мюрщи оьрчIру ливтIусса ишру 4,7 % чан хьуну бур. Вай билаятрайсса аьмсса тагьарданух бурувгун, 2,5 чанссаннун хIисавну бур. Шин хьун бувасса оьрчIру ливтIусса ишру 9,6% чанну хьуну бур.
— Нава къуллугърайн зун увкIсса чIумал республикалийсса цIуллу-сагъшиврул ара хъинну чIявусса масъалартту салкьи хьусса, чIяруми районнай ва шагьрурдай лащинсса, къашайшалт уттубишин бан нигьачIисса тагьарданийсса дия. Дуллалисса цIушиннарду щуркIаллагу къахъанахъисса захIматсса тагьарданийсса дия. Чанссарагу асар хьунсса дахханашивуртту хъанай дайдирхьуссар ларгмур шинал. Жуща бювхъунни цаппара азарханарду ва поликлиникартту уттизаманнул медициналул оборудованиялул дузал бан, ми бакьин бувну, цIу буккан бан. Вания гихунмайгу мува ххуллий зунтIиссару, — увкунни министрнал.
Жамалуттин ХIажиибрагьимовлул бувсунни нацпроектрай ца ялагу хъуннасса къулагъас думур масъала анаварсса медициналул кумаграцIун бавхIусса бушиву, цума-цагу инсаннан медициналул кумаг бан буржлувшиву яла гъансса, чIаравсса поликлиникалий ягу ФАП-рай.
Ларгсса шинал нацпроектрал лагрулий республикалул районнай, щархъаву 20 ФАП бувну бур ва ми медициналул аьркинсса хъуслил кьай-кьуйлул щаллу бувну бур. ФАП-ру жула щархъаву буллантIий бур вания гихунмайгу.
«Бережливая поликлиника» тIисса проектрал лагрулий республикалул поликлиникарттай зунтIий дур, чагъарду чан бувну, хIакинтурачIансса халкьуннал иржа «электрон» журалий сияхIрайн ласласаву.
Пресс-конференциялул ахирданий Ж. ХIажиибрагьимовлул журналистътурал суаллахьхьун жавабру дуллунни. Миннувасса цаннихьхьун жаваб дуллай, министрнал кIицI бунни хIукуматрал медициналул идарарттай агьалинансса «бахиллу» ва буцIин бансса чагъарду уквасса бушиву ва щихьчIав ихтияр дакъашиву миннух багьа ласлан.
