ПаччахIлугърал Думалул депутат Юрий Левицкийл барча дунни машгьурсса тележурналист, «Дагестан» ГТРК-лул директорнал хъиривчу, Аьрасатнал культуралул лайкь хьусса зузала,
Культуралул министерствалул жяматийсса советрал председатель Салам Хавчаевлул кIилийнусса юбилей: 70 шин цанна ва 50 шин творчествалул даврий зий.
П. Рамазанова
«Ина телевидениялий, чIивима редакторнал даврияту айивхьуну, «Дагестан» Гостелерадиокомпаниялул хъунаманал къуллугърайн гьаз хьусса инсан ура, цал комсомолданул, яла партиялул организациярттайгу каялувчину ивкIсса, даврил биялсса опытгу бусса, бюхъу-хIарачатгу, гьунаргу бусса, на ххарину ура ина барча увансса сант дирирну», — увкунни Ю. Левицкийл.
Ванал кIицI лавгунни дагъусттаннал телевидение хьхьичIуннай шавриву Салам Хавчаевлул бутIа бушиву, ва яргсса телепередачарттал («Планета Культура», «Позиция ва оппозиция», «Ракурс» ва цайминнул) автор ушиву, гьашину Ххувшаву ларсун 75 шин хъанай дунавхьур, личIинура кIицI лаган ччай ушиву «Токс ведёт поиск» тIисса передача. Бувсунни аьрай ятIа-тIар бакъа ливчIминнах луглагисса, агьамсса давурттив дуллалисса Саламлул передача дагъусттаннал телевидениялий ца яла лахъисса тарих бумурну хьушиву ва краеведтурал кьюкьлул штабрал хъунаманугу цува Салам ушаврилгу мунал чулинмайсса хIурмат ххи буллалишиву. Машгьурсса тележурналистнал ва бюхъу бусса каялувчинал даврин лахъсса кьимат бишлай, ванал Саламлун буллуна Барчаллагьрал чагъар. Салам Хавчаевлулгу Юрий Левицкийн оьвкуна «Дагестан» ГТРК-лул шинал ахирданий хьунтIисса 60 шинал юбилейрайнгу, ТОКС-рал 50 шинал юбилейран хас дурсса слётрайнгу, пишкаш бувна цала чивчусса «Здравствуйте, дорогие телезрители» тIисса лугу.
