Ххал бивгьунни къювусса масъалартту

Ккуллал райондалул администрациялул залдануву хьунни шяраваллал жяматирттал оьрмулуву биттур бан аьркинсса ма­съаларттан хас дурсса совещание.

Миккун бавтIун бия шяраваллал бакIчитал, идарарттал каялувчитал. Мажлис бачин бувну ия райондалул бакIчинал хъиривма Ажуб ХIусманов.


ХIажимурад ХIусайнов
Жунма кIулсса куццуй, ок­тябрь зурул 1-нния 31-ннийнин Аьрасатнаву най дикIантIий дур агьалинал перепись. Шикку шяраваллал бакIчитурай буржну бивхьуна анаварсса мутталий циняв шяраваллаву хIасул бан перепись дуллансса коми­ссияртту.
Мукунма гьаз бувна къатрал ва бакIлахъия ласайсса аьрщарал заллухъру ккаккан буллали­сса чагъарду (зеленкартту) щаллу буван багьлай бивкIун бунува, уттигу ва иш щаллу къавхьушиврул масъала. Ванинсса багьананугу бусса бия шяраваллал генпланну къадурну душиву. Шяраваллал бакIчиталлив тIурча, 2020-ку шиналсса бюджет утти­гу ккаккан бувну ба­къар тIий бия. Ва дузал хьуншиву бувсуна райондалул финансирттал отделданул каялувчи Кьурбан Амучиевлул.
ХIакьину щаллара дунияллийн аваза багьну бур Китайнаву сукку хьусса коронавирус тIисса инфекциялул ялув. Мунийн бувнугу Ккуллал райондалул Роспотребнадзорданул хъунмур хIакин Лайла Сулаймановал баян бувна щин шяраваллавун дурцусса кIанттурдал лагма чапарду дикIан аьркиншиву, гай ятту-гъаттарал, жанавартрал чапал къадулланшиврул. Миккува чанигу лавхъун бикIан аьркин­ссар куна. Ялагу чIун-чIумуй щинал анализ дуван гьан дуллан аьркинну бусса бия. Амма, бусласаврийн бувну, хIатта аькIри дихьлай бухьурчагу, шяраваллал бакIчитал вай иширттах биччибакъулшиву дуллай бусса бия.
«Жула жува къабуруччирча, яла хIакинталгу хъирив лаллай бакъар. ЧIалай бурхха чIяруми инфекциялул цIуцIавуртту ппив хъанай душиву чапалсса щин сававну», — куна Л. Сулаймановал.
Совещаниялий ялагу гьаз буллай бия шяраваллил оьрмулуву махъсса чIумал хьунабакьлакьисса цамургу иш. Щин дурцуну махъ, гай лавкьусса щинаххуллувух нани къадурну, кIичIирттавух итадаркьуну душиву буслай бия, яла микI ларчIсса щинай инсантал, гъаттара ччех бикIлай, апатIру хъанай бушиву. Ва ма­съалагу шяраваллал администрациярттайн багьайсса бушиву бувсуна Ажув ХIусмановлул.

Совещаниялий ххал бигьлай бия цаймигу агьамсса ма­съалартту.