«Илчилул» бахшишру ххи хьунни уттигу

«Илчилул» бахшишру ххи хьунни уттигу

Февраль зурул 18-нний Дусшиврул къатраву хьунни Дагъус­ттаннал Миллатрал политикалул ва диндалул иширттал министерствалул хIасиллу дуллалисса коллегия. Тикку гьуртту хьунни Республикалул ХIукуматрал хъунаманал хъиривчу Рамазан Жяъпаров,

Дагъусттаннал БакIчинал маслихIатчи Камил Ланда, Да­гъусттаннал ХIукуматрал председательнал маслихIатчи Владислав Шаталов, Жяматийсса палаталул хъунама АьбдулхIалим Мачаев, Халкьуннал Мажлисрал Миллатирттал иширтталсса буллалисса комитетрал хъунаманал хъиривчу Марина Котенко, диний­сса ккураннал вакилтал, жяматийсса ишккаккулт.


П. Рамазанова
Ларгсса шинал министерствалул дурсса даврия гьарза-гьартану бувсунни министр Энрик Муслимовлул. Бувсунни цуку-цукунсса хъуни- хъунисса проектирттаха зун дакIний бу­ссаривгу.
Миннацрал Экспертътурал советрал даврия бувсунни му советрай каялувшиву дуллали­сса Руслан Абакаровлул. Шаннагу диндалул вакилтурал, Шамил Аьлихановлул, Виталий Тарасовлул ва Валерий Дибияевлул, ихтилатругу бия республикалий, миллатру ва динну личIи къадуллай, бавкьуну, хIала-гьурттуну дуллалисса давур­ттая.

«СМИротворец 2019» ххуйсса гьурттушинна дуваврихлу ва хьхьичIунсса кIану бугьаврихлу Барчаллагьрал чагъар буллунни кказитрал хъунама редактор Руслан Башаевлун.

Миннацрал Жяматийсса советрал хъунама МахIаммадхан МахIаммадхановлул, ларгсса шинал дурсса давурттая буслай, кIицI лавгунни гьашинугу агьамми масъаларттавух бушиву миллатирттал мазру, халкьуннал культура ядаврицIун ва гьаз дуваврицIун бавхIусса масъалартту, мукунма зунттал кIанайминнал багьу-бизулух лайкьсса къулагъас дуваву.
Ихтилатру бувна Санкт-Петербургливсса Дагъусттаннал полпред ХIасан ХIасановлул, жагьилтурал иширттал министр­нал хъиривчу ПатIимат Оьма­ровал, Расул ХIамзатовлул цIанийсса дунияллул халкьуннал фондрал вице-президент ХIабибат Аьзи­зовал, жяматий­сса ишккакку Шамил Хадуллаевлул ва цаймигу бусравсса инсантурал.

Коллегиялул ахирданий «Илчилун» дия бахшишру. ЧIявусса инсантал бавтIсса му мажлисрай ца жул кказитран дакъа дакъая бахшишру, мунивугу дия пахру бувансса ххаришиву. Терроризмалийн къаршисса макьалар­ттал конкурсраву хьхьичIунсса кIану бувгьусса Андриана Аьбдуллаеван буллунни цалчинмур даражалул диплом. Щалвагу Аьрасатнал СМИ-рдал сийли­сса конкурсрай , «СМИротворец 2019» ххуйсса гьурттушинна дуваврихлу ва хьхьичIунсса кIану бугьаврихлу Барчаллагьрал ча­гъар буллунни кказитрал хъунама редактор Руслан Башаевлун. Ва конкурсрая Москавлияту цалчинмур кIану бувгьуну бувкIсса ттунгу, ПатIимат Рамазанован, дуллунни ХIурматрал грамота. Гьаннайсса, жул редакция ХIукуматрал ва агьалинал итталу бур, кьиматрай бур.

Читайте также: