Маз – миллатрал ттарцIри

Маз – миллатрал ттарцIри

Лакку мазрал байрандалийн бавтIун бия тачIав бакъачIин биялсса лак

Февральданул 18-нний МахIачкъалалив Дусшиврул къатлувун «Лакку мазрал кьини» тIисса цIанилу дуллалисса байрандалийн бавтIун бия хъинну чIявусса лак, аьмну 1000-нния ливчу­сса инсантал, 800-900 инсан лагайсса залдануву, щябикIансса чув бикIави, бацIанссагума кIану бакъая.


Бадрижамал Аьлиева
Лакку мазрал байран хьунни февральданул 21-нний щаллагу дунияллий кIицI лагайсса Ниттил мазрал кьинилун хасну. Му сакин дурну дия «Вирттал» тIисса Лак­рал жагьилтурал ккурандалулгу, Республикалул Миллатрал политикалул ва диннал иширтталсса бувайсса министерствалулгу.

Дусшиврул къатлул жанахI­раву бия миллатрал багьу-бизу, канил пишарду ккаккан буллалисса, миллатирттал дукрардащалсса ссупрардугу, суратир­ттал выставкардугу дусса, Лакрал, Ккуллал ва ЦIуссалакрал районнал культуралул зузалтрал, Бархъаллал тIахIунттал «Гончар» арт-студиялул ва «Гъази-Гъумучи-Травел» турист компаниялул хIадур бувсса майданну.


Шадлугърайн бувкIминна­хьхьун салам буллалисса ва ни­ттил мазрал байран барча дуллалисса махъ лавхъуна Лакрал жагьилтурал ккурандалул председатель Давуд Амировлул.
Гихунмай мажлис бачин бувну бия ДР-лул культуралул лайкь хьусса зузалт Абуссупиян Оьмаров ва Тамара Закарияева.

Ниттил мазрал мажлисрай ххуй-ххуйсса махъру лавхъуна цаннаяр ца бусравсса хъамаллурал: ДР-лул миллатрал политикалул ва диннал иширттал министр Энрик Муслимовлул, ДР-лул Халкьуннал Мажлисрал председательнал хъиривчу Камил Давдиевлул филологиялул элмурдал доктор, профессор Эса Аьбдуллаевлул, ДР-лул муфтийнал хъиривчу МухIаммад Майрамовлул
Лакрал райондалул админист­рациялул бакIчи Юсуп МахIаммадовлул, Ккуллал райондалул администрациялул бакIчи Шамил Рамазановлул, ЦIуссалакрал райондалул администрациялул иширтталсса буллалисса СултIанат Цунтаевал, хъаннил «Дараччи» клубрал хъунмур Гульшан Хасаевал, МахIачкъала шагьрулул 16-мур школалул лакку мазрал учитель ПатIимат Аьлиевал, Дагъусттаннал РувхIанийсса управлениялул КIулшиву дулаврил отделданул начальник МухIаммад Ссаламовлул, МахIачкъала шагьрулул Кировский райондалул бакIчи СалихI Сагидовлул, тарихчи Исмяил Аьлиевлул.

Бюххансса ва дакIний личIансса балайрдайну мажлис чIюлу бувна Арслан Шагьмандаровлул, Лариса ХIажиевал, Гьажар Рамазановал, Аьбдул Мурадовлул, Загьидат Муслимовал, Зульфия Архилаевал, Нурианнал, Самед Бу­ттаевлул, Адам ХIайдаевлул, Рамиль КьурбанмахIаммадовлул, къавтIавуртту ккаккан дуруна РахIима Сулаймановал каялувшиндаралусса «Ссалам» ансамбльданул ва 11-мур гимназиялучIасса «Гюнеш» ансамбльданул, «Оьтту ва макь» пьесалувасса парча ккаккан бувна Лакрал театрданул артист Адам ХIайдаевлул. Ккуллал райондалул культуралул зузалтрал хъинну усттарну ва бюхханну кка­ккан бувна Хъун дяъвилия шама арс зана къавхьусса ниттиясса пьесалувасса парча.
Лакрал жагьилтурал ккурандалул чулуха «Гъази-Гъумучи» Шинал пишакартал» тIисса лишан-премия дуллуна Эса Аьбдуллаевлун, СалихI Сагидовлун, Гульшан Хасаеван, Исмяил Аьлиевлун, Рамазан Рамазановлун, Карина Далиеван.

Назмурду дуккаврил конкурсравух гьуртту хьусса 300-гу инсаннан фондрал дуллуссар Надир Хачилаевлул чивчусса ххаругу бусса кружкарду ва Барчаллагьрал чагъарду.
Лакрал жагьилтурал ккурандалул бакIчи Давуд Амиров барчаллагь тIий ур чIарав бацIаву дур­сса лакрал шаннагу райондалул бакIчитурахь, МахIачкъала шагьрулул Кировский райондалул бакIчи СалихI Сагидовлухь, ДР-лул Жяматийсса палаталул хъунаманал хъиривчу Ссапарбаг Аьбдуллаевлухь, «Жалин» фирмалухь, Гульшан Хасаевахь, Миннацрал каялувчинал хъиривчу Гьарун Давудовлухь, культуралул министр Зарема Буттаевахь, Лакрал театрданухь ва Дагъусттаннал паччахIлугърал филармониялухь, Лакрал радиолухь ва Дагъусттаннал телевидениелухь, «Илчи» кказитрахь ва чIарав бавцIусса цинявннахьвагу.
Ниттил мазрал кьинилуцIун бавхIуну баян бувну бивкIсса конкурсирттая ва миннуй гьуртту хьуминная жу гьарта-гьарзану бусанну « Илчилул » хъиривмур номерданий.

Читайте также: