[dropcap]В[/dropcap]анияр кIира шинал хьхьичI, социолог Аьбдулла Аьлиевлул сипталийну, мунал пикрилуцIун юрист Руслан ЖахIпаров ва энергетик-инженер Зураб Аьлиевгу бавкьуну, сакин дурссия «Шахьуйми» тIисса фонд.

Мунил агьаммур мурадгу – Шахьуйннал шяраваллил къайгъурдалсса буллалаву, мукунсса давурттавух шай­ссаксса чIявусса жагьилтал гьуртту буллалаву, тарихийсса ватандалия ялу-ялун арх дуцлацисса жагьилсса никирал ва шяраваллил дянивсса арарду цIакь даву. Уттигъанну МахIачкъалалив «Гранд-Плаза» комплексравусса Халкьуннал канил пишардал дуссукъатлуву хьунни му фондрал цIусса шиналсса цалчинсса батIаву.

---

Бадрижамал Аьлиева
Ва ххуллухмур хьунабакьаврийсса агьамми ихтилатру хьуна шяраваллил тагьар, ахIвал-хIал къулай баву, шяраваллил тарихрал кьимат, му лахьхьаврих­сса гъира жагьилтураву ххи баву, бучIантIимунихсса буруккин бутаву мурадрай 2020 шинал дуван дакIнийсса давурттая.
БакIрайва цал цинявнналагу ххал дунни «В поисках Айдентики» тIисса фильм. Ва фильм ларсъссар Дагъусттаннал ихIсаниятрал фондирттал «Друзья милосердия» тIисса Ассоциациялул, «Гъази-Гъумучи» фондрал ва Лакрал организациярттал Ассоциациялул (мунил учредительтуравасса цану хъанахъиссар «Шахьуйми» фондгу) бувсса экспедициялул аьрххилий. Миву гьаз бувну бур лакрал шяраваллу хIакьину лирчIсса тагьарданул масъала. Хъирив ххал дунни Шахьуйннал шяраваллил футболданул командалиясса фильм. Вай кIирагу фильм ларсъссар хъинну гьунар бусса оператор, билаятрай сийлийсса ВГИК-рал выпускник, МухIаммад Гъазиевлул.

Муния гихунмай гьарта-гьарзасса ихтилатру хьунни ва шинал дуванми давурттая: шяраву Хъун дяъвилийн лавгминнах дацIан дурсса гьайкал цIу дуккан даву ва 9-мур майрай му тIитIаву; Рамазан байрандалул ва Кьурбан байрандалул лагрулийсса давуртту; Шяраваллил кьини ва мунил программа; МахIачкъала-Гъумучи паччахI-ххуллий, шяраваллил хьхьичI МахIаммад Къандаевлун дацIан дурсса гьайкал цIумур ликказандарайн (остановкалийн) дизан даву; цIинцI-ччюрк дичлан­сса кIанттулсса баву; волейболданий буккайсса майданналул ремонт даву; субботник даву, мунил лагрулий аьра­ххуллия шяравунмур ххуллугу бакьин бувну ва м.ц.

Ва кьинисса батIаврийн бувкIминнайх дарчIунни шяраваллил суратру дусса шанма журалул календарь, ва шинал шяраваллицIун дархIуну дуван нанисса давуртту ва ми дуван дакIнийсса кьинирдугу кIицI ларгсса.
Гихунмайсса хаварду хьунни нахIу-нацIушивурттал ссупралух.