Цалчинмур ЦIувкIратусса цIанихсса Ххяллуххъал агьулданиятусса Оьмарова Шарипатлул оьрму лавгун бур уттисса чIявуми зунттал хъаннилсса кунма: бачIи оьрму – шяраву, бачIи – шагьрулий.
Школалий дуклакисса чIумалва колхозрал давурттавух хIалану бивкIун бур. Танийсса никиран кунма, яла хъинмур захIматрал школа ванингу колхоз хьуну дур.
ПатIимат Рамазанова
— ХьхьичIунсса колхоз дикIайссия жул ЦIувкIуллал, Совет Союзрал кIийла Виричу АхIмад-Хан Султаннул цIанийсса. Ккуллалмур колхоз цалчин дикIайссия, ЦIувкIуллалсса – кIилчин, — тIий, дакIнийн бутлай бур Шарипат. — Ккуллал дояркахъащал нагу лавгссара щаллагу Союзрал шамилчинмур съездрайн. Танийсса инсантал бигьа ччисса бакъая, захIматрал инсан гьаз увайшиву кIулсса бия. Ца гъирарай зун бикIайва инсантал, яттил чIиру баврия, оьллал бярчру буваврия ххари хъанай, хъу-лухччиния бакIлахъия аваданну хьурча ххари хъанай бикIайва…
Лас АхIмадищал ряхва оьрчIгу ччаннай бацIан бувну, узданну чивунгу буккан бувну бур. ОьрчIру хъуни хьуну, шагьрурдай дуклан буххайхту, оьрчIругу янилу бикIан, МахIачкъалалив бивзун бур вайгу. Шарипат «Салам» кафелуву зий бивкIун бур 10 шинай. Зий бивкIун бур ва МахIачкъалаллал Централ азарханалий операциярду бай блокраву санитаркану. Тиккугу, лажин кIялану зий, лайкь хьуну бур барчаллагьрал чагъардан ва хIурматрал грамотарттан.
Шарипатлул 85 шинал юбилей дунни вай гьантрай «Инт» кафелуву. Ванил захIматран ва инсаншиврун барчаллагь учин бавтIун бия чIявусса агьлу.
— ЦIувкIуллал шяраву ца нава бакъа бушиву къакIулли ххюра ник ккаккан нясив хьусса, мукьра ник нясив хьусса бур, ттуннив ххюйлчинмур никну хъанахъисса чIивитIугу карав буцинсса талихI хьунни. Арс ивкIу ниттил дардгу духIан багьунни, ЦIувкIрав на кунмасса чIявусса бур, яхI буван багьлай бия. Утти ттул ца мурад ливчIун бур – нара дунияллия гьаннин кIа ттулла буттал шяравалу ккаккан ччива. На хIисав дуллан дикIара, дурвав ЦIувкIрав на ша къабивзсса ца метра аьрщарал, бурвав цулуй, ххулув буллай на къабивсса лухччинул парча, бурвав цавагу щаращи, бувххун, багьтIатI хьуну нанийни, мякь лиххан щинал ххув къакусса? На цинявгу цIувкIра-хъаннил учинмурда тIутIисса. Буттал буттахъал жуйнна аманат дурсса Ватан макьаритару, цIулаган дувара ЦIувкIуллал цIанихсса шяравалу! Хъинну ххари хьура уттигъанну шяраваллил хъунаману ивтсса ХIажирамазан ххуй-ххуйсса давурттив дуллай ур тIий бавну. ЦIувкIуллал жагьилтурахьгу миннатри, ХIажирамазаннул чIарав бацIияра, уссушиврий ва узданну къуццу тIутIияра…
Укунсса щугълурдай бур хIакьинусса кьинигу 85 шинал оьрмулувусса Ххяллуххъал МахIаммадлул душ Шарипат! Барча вил юбилей, Шарипат-ниттирссуй! ТIайла дацIаннав ЦIувкIул цIулаганнав тIисса вил дуаьгу, цIуллушиву дулуннав вихьхьуннагу, ххари булланнав наслулул!
