Соцсетирдай Жавраил Хачилаевлул чивчумур, ванал дакIнийн бичавуртту дуккайминнан хIисав хьуссар авторнал мукъул усттаршиву.
Оьруснал чичу А.П. Чеховлул кунма, кутIану, гьунар буну чивчусса, мяъна-мурад дусса ванал хаварду навагу мудан гъирарай буккара.
Жун пикри хьунни ванал цала цIанихсса шяравучу ва гъанчу Кумиял СалихIлуя дакIнийн бутлатимур «Илчи» кказитрайгу бищун.
Муданна кунна, та шиналгу ттул гъинтнил каникуллу аьдатравун дагьсса куццуй дайдирхьуна. Гьарица шинах, нину ахиратрахьхьун ларгун махъ МахIачкъалалия Кумав бивзун, ттул гъинтнил каникуллу буттащал зунттаву лагайва.
Нину аьпалул хьуна 1976-ку шинал, февраль зуруй. Га шиналсса кIи ляличIинура дяркъусса, марххалтту бусса хьуна. Ниттирссу Аьишатлул жу цичIанма бувцунав, цила шанма душнил ялун — мукьа жугу. Тани на ххюйлчинмур классраву дуклакисса оьрчI ияв. Июнь барз байбишайхту, августрал ахирданийн бияннинсса чIун на цал дайдишайссия жула шяраваллил ялувсса ТтурчIайнна-Зунттуйсса гъаттара-лухччай. Яласса барз ва бачIи лагайва Дулттияллил бизанттай. КIиккун биянгу 5-6 кьини шайва. Ва дия цила дикIайкунсса экстрим, хIал ххал бигьаву.
КIилчинсса нюжмар най дия цинявппагу жул яттикъушлил хIухчалт, миннащал ттул ппугу, цала-цала шаппай лавгун. Щалагу яттикъушлий жу шама ливчIунав: кIия хIухчил арсгу (ттул оьрмулувусса оьрчIру), нагу. КIай кIиягу чIаххуврайсса Ахъушиял райондалийсса Мулебки тIисса шяравасса бия. Жуйн, шама мюрщи жагьилнайн, тапшур дурну дия кIира ттурзан – шаназарва хIайван бусса. Ца ттурзан дия ттухь.
КIира нюжмар ларгуна буттахъая цичIав хавар бакъа.
Укунсса оьрму чунчу кусса нагу ссавурданува уклай ияв. Сси-къащилулгу виувцIуну, яттил ттурзангу къушлия арх дакъасса лухччинийн итадаркьуну, аглан хьусса ттун зунттул дуламанттуха увксса кIия бурттигьугу, кьай-кьуй дирхьуну миннал хьхьичI нанисса ттуккугу ххал хьуна. Гъан шайхту, ттун бувчIуна ниттил ссурахъу СалихIгу, ганал арсгу. СалихIния, тIайламур бусан, ттун архниява увчIунача: цукунъя къаувчIин кIира метраксса бюхттулсса, кьуват бусса, зирангсса чув-адамина! Му ия, Дулттияллил зунттул «ургала» кунасса инсан. Егерь. СалихI кIулссия, мунал хIурмат хъунмассия щалагу округрайсса хIухчалтралгу, авчитуралгу, браконьертуралгу дянив. СалихIлущал ия чIивима арс Мамай, шяраваллил жяматрал мунайн Къаллу чайссия. Битавсса, дири-кьирисса, бажар бусса, цувагу тяхъанувасса жагьил ия. Мунал яла захIматмур тагьарданувагу уккансса ххуллу лякъайва. Ттун га ссят ттухьхьунна дирирсса сант ишла дансса пикри хьуна: цалчин, ттула рязиакъашиву ккаккан дан, кIилчин, гай нанисса кIанттурдайн иян ччисса ттула хиялгу бартбигьин. Цува СалихIлущал архIал ачин ттун хъунмасса тIайлабацIу хьуна! Итадакьайххивав на дирирсса сант. Гъан хьуну СалихIлучIан, навагу цащала уца учав. Рязи хьунни.
Иш-тагьар бувчIиншиврул бусанна. Жу нанисса кIанттурду жул яттикъуш бусса кIаная 70 километралул архну бия. Миккунсса щала ххуллугу къабигьасса, зунттал жегъирххуллурдайх ва къумаратIавух нанисса бия. На мийннал цала кьюкьлувун кьамул айхту, ххаришиврул, яттикъушлийн левчуну лавгун, ттула плащ ва ттархьгу ларсун, ххуллийн агьра. Жу най цаппара гьантри хьуна. Жул ххуллул чIивисса бутIа цал Гъуниннал райондалийх, хъирив ЧIарадиял райондалийх нанисса бия. ЛяличIинува дакIний ливчIуна «Рисиннал вацIа» – Шаллал шяраваллия арх дакъасса илкинсса ттарлил хIалу. Му чIумал, июль зурул дязаннив, СалихI цала арсурвавращал ва гъан-маччанащал учIайва Дулттияллил зунттайн авлул кьяцрах уруган, кIайннун цIу бишин ва кIиччахсса тагьар кIул дан.
Ниттил ссурахъу кIулссия райондалул кьатIувгу. Кьянкьасса адамина ия, чIалачIингу хIурмат тIалав буллалисса дия. БучIайва вай зунттайн ятту Дулттияллил чулийнмай бачин буллан ца-кIира нюжмар лирчIсса чIумал, гьалаксса зунттал неххардийх яттил ттурзанну дачинсса ламурду бишин. Сезон къуртал хьуну махъ цала даврих гьарца яттикъушлия ца-кIива хIайван ва ца карши яттил нисирал ласайва. ЧIарадиял райондалийсса Арчиял шяравун бияйхту, кIиккусса ттучандалия дукан-хIачIанмур ласарду. КIанттул ттучандалий личIисса аваданшивугу дакъая, пряник-печенье, сухартту, сгущенное молоко.
Арчиб дазуйсса шанна шяравалливасса ца хъанай дур. Вай шяраваллал хъирив байбихьлай буссар вахIшисса билаят ва гихунмай лахъазанттуйнсса жегъирххуллу. Жу кIа ххуллийх лавгру, цанчирча кIиччачил Дулттияллил чулийн буккан бигьану буссар, жуламур, Лакрал райондалулмур, чулуханияр. Амма ялагу захIмат хьуна.
Иш цакуццуй къабагьайхха.
Хьхьу рутан Арчиял лахъазанттучIа бавцIуру. КIюрххицIунмай, дучрай ва ттуккуй жула кьай-кьуйгу дирхьуну, лахъазан лахъан бавчуру. Му ппурттуву СалихIлул прогноз тIайла къадарцIунни. Щала лахъазан марххалттанихь дия. Кьайлущалсса балчантгу, ттуккугу марххалттанивун кьутIлай, гай буккан буллан багьлай бия. Ялув-ттуккун, марххалттанул бурангу бивщунни. Яру тIитIин бюхълахъисса иш бакъая. Кьини хьхьунийн кIура даруна. Буллан бивкIуна гужсса марххала, бишлан бивкIуна занч. Оьккисса, нигьачIисса тагьар хIасул хьуна.
Дучрая ва ттуккуя ликкан дурну, кьай чятирданун кIанайсса брезентрай дихьлан багьуна. Муний дишарду навтлищалсса канистрдугу, дуки-хIачIиягу, жущаласса ччатI ва муму-тамургу. Цал, хIалли-хIаллих тIий, гьарзат ялун ххилан багьуна, яла, зана хьуну, марххалттанивун кьувтIусса дучри ва ттукку буккан буллан багьуна. Къаккавк къаливчIуна. Лахъазанттуйнгу лавхъун, цахъи бигьагулавгун, утти ялавай бачин багьлай бия. Жула кьай-кьуйлущал ялаваймур ххуллугу бигьасса къавхьуна. Нихъри марххалттанивун кьутIин буллай, жула кьайлущалсса брезентгу хъирив лавсун най, цукун-бунугу лахъазанттул ухницIун бувчIру.
Укун най, бивру жува бацIансса кIанттурдайн. СалихIлун кIулну бия чув ци дурччуну дуссарив. КьюлтIсса кIанттурдай дурччуну дия лахъисса чапарду (штакетникру) ва хъуни бакъасса мурхьирдал тталлу, хъинну цIакьсса тIаннул журалул. КIай дуккан дурну, неххардил ялтту дирхьуну, ялув кьасса чарттугу бивхьуну, жу ятту неххайх лахъансса ххуллурду барду.
Нехру личIину хъунисса дакъанугу, мугьалттул бигьанма ласайсса бия мюрщисса ва хьхьара бувксса ятту. Мунияту хIухчалтран къулайну бикIайсса бия ххуллу бувминнан ца-кIива хIайван булун, ацIвахъул неххал ласун баяр. Щала ххуллийх жуйсса янна атилну дия, сир-сир тIий, дакъацIавай дия мюрш гъарал. БакIрайх дирхьусса кунна, ялату къаларгуна ттурлу.
Ца укунсса кьини на СалихIлухь учав: «Нину-ппу ттух ялугьлай бухьунссар, на гайннахь къабувсъссия», — куну. СалихIлул, ттухь барчаллагьгу увкуну, балчангу буллуну, ххуллухъиндаран ацIра къурушрал кагу дургьуну, на тIайла увккунав. Шавайн ияйхту, цала балчангу хъунама арснахьхьун, Аьзизлухьхьун, була увкуна.
АцIра къуруш ттун та чIумал чIярусса арцуну дия. Мамайл тIайла увккунав на лахъазанттучIан ияннин. Лахъазан утти жула чулухасса дия. Вай ацIвагу гьантлул дянив кIикку марххалтту мадара бавссуну бия. КIичча шавайн иян ца 70 километра духьунссия. Авчура лазахъанттул вахIшисса жегъирххуллурдайх, къумаратIавух, Гъази-Гъумучиял Къуйсулул чIарахсса ххуллурдайх. Тара кьини, ссят хьхьунил ацIния кIира хьусса чIумал, ивунав шавай. Шяравун уххайхту, тIааьнну бивщуна хасъсса шяраваллил кьункьал хIахIгу, гъилисса хьхьунил чIаракIлугу. Сагъ-саламатну шавай ияврия хъинну ххари хьунав.
Му чIумал бутта зунттуй уну, на танмихIраща мурахас хьура. Ниттилссил чан-кьансса дяъви бувна. Мунийну къуртал хьуна. Шяраваллил «разведкалул» баян бувну, миннан кIулну бия на СалихIлущал лавгсса, мунияту личIину буруккинттарай бивкIун бакъая. Ца кьини шардагу дурну, на ялагу махъунай буттачIан зунттуйн гьан увнав. Байбивхьуна гихунмайсса гава куццуйсса оьрму.
Жавраил Хачилаев
Таржума бувссар
А. Аьбдуллаевал
