«Ттуяту шаэр увсса ттула миллатралли»

«Ттуяту шаэр увсса ттула миллатралли»

Уттигъанну цIуминалийсса ЦIуссачIурттащиял школалий хьунни Дагъусттаннал халкьуннал чичу Мирза Давыдовлул «Бу­ттал аьрщарал туннулул тарг» тIисса луттирал презентация.

Ванил сиптачи ва сакиншинначи хьунни ЦIуссалакрал райондалул бакIчи МахIаммадхIажи Айдиев.


Шаэрнал кьини хъун дан бувкIун бия Дагъусттаннал Чичултрал союзрал лакрал секциялул хъунама Илияс МахIаммадов, «ЦIубарз» журналданул редактор Хизри Илиясов, Мариян Илиясовал цIанийсса «Дараччи» ихIсандалул фондрал хъунмур Гульшан Хасаева, шаэр-педагог Даниял Магьдиев, ДучIиннал шяраваллил администрациялул хъунама АбутIалиб Аминов, ЦIуссалакрал райондалул кIулшивуртту дулаврил управлениялул хъунмур Светлана Къудаева, цIуминалийсса школар­ттал директортал.

Экрандалий суратругу кка­ккан дуллай, шаэрнал оьрмулия ва творчествалия бувсунни ЦIуссачIурттащиял дуклаки оьрчIал.
Хъирив ихтилат бунни Ма­хIаммадхIажи Айдиевлул.

— Творчествалул инсантал мудангу лайкьссар лавайсса хIурматран. Шаэр, чичу – му миллатрал лажинни. Миннал творчествалийну жула хьхьичI дацIайссар лавгмунил сурат, аьч шайссар миллатрал тарих ва культура, буруккинтту, оьмур ва хъинмур. Бусравсса цIа ва авадансса творчество махъ кьаритан бювхъусса Мирза Давыдовгу талихI бусса инсаннан ккалли ара. Миллатрал кьадардануцIун бавхIусса бур ванал чIявусса шеърирду.

Ттатталмур гьав зунттаву,
Бутталмур Чачаннаву,
Цумур гъурватрай бурвав
Ттун гьав дувансса кIану?

Вай ца-кIива ххуттавагума аьч хъанай дур шаэрнал къюву.
2016 шинал март зуруй ЦIу­ссалакрал райондалул делегация Къиримнал Саакский райондалийн хъамалу нанисса чIумал Мирза Давыдовлул чивчуссия Къиримнахасса шеъри. Оьрус мазрайн таржума бувсса му шеъри тийх бувккусса чIумал Къиримнал агьулданун му хъинну асар хьуна, — кунни цала мукъуву Айдиевлул.
Мирза Давыдовлул творчествалун лавайсса кьимат бишлашисса ихтилатру бунни мукунма Даниял Магьдиевлул, АбутIалиб Аминовлул, Хизри Илиясовлул, ТIюхчардал школалул директор ЩайхахIмад Дадаевлул, ДучIиннал школалул директор Бахттун Шуаьевал.
Дуклаки оьрчIал ва райондалул культуралул къатлул зузалтрал бувккунни Мирза Давыдовлул шеърирду, увкунни балайрду, ккаккан дунни къавтIавуртту.

Ахирданий махъ лавхъуна цала шаэрналгу.
— Ттуяту шаэр увсса ттула миллатралли. Ттула миллатрал бакIрачIан бувкIмунил, миннан духIан багьсса кьинирдал къювулий ура на хIакьинусса кьинигу. Тай лухIи кьинирдал дайдихьу хьуния махъ ларгунни 75 шин, амма халкьуннал дакIурдивусса къюву лагь къархьунни. ЦIанасса ттул ххаришиву дур шамилчингу мина да­ххана дан кьисмат хьусса жула халкьуннан МахIаммадхIажи Шихамирович кунасса бажар бусса, дакI цIуцIисса каялувчи бакIрайн агьаврия. Къабигьану бур хIакьинугу бизан баврицIун бавхIуссса захIматсса масъалартту нанисса райондалий каялувшиву дан.
ХIакьину, вайксса хъамаллурайнгу оьвкуну, ттула творчествалун лавайсса кьиматгу бивщуну, ва ххаллилсса мажлис баврихлу на ванайн дакIнихтуну барчаллагьрай ура. Барчаллагь тIий ура цинявппагу ттула кьини хъун дан бувкIминнахь, — увкунни Мирза Давыдовлул.

Андриана Аьбдуллаева,
Имара Саидова

Читайте также: