Инстаграмрай машгьурну бур Лакрал жагьилтурал ккурандалул (ДООО «Лакское молодёжное общество») баян бувсса,
лакку мазрайсса шеърирду буккаврил конкурс. Дунияллул халкьуннал дянивсса статусрал лагрулийн гьаз хьусса ва конкурсрай назмурду ккалай бур мюрщимигу, хъунимигу.
П. Рамазанова
Конкурсрал шанна номинация дур оьрмулул шинну хIисав дурсса ва ччиманаща гьуртту хьун хъанайгу бур. Яла чялишну гьуртту хъанахъими бур оьрчIру: миннал аьдад вай гьантрай 240-ха ливчусса дур. Биялсса бур оьрмулул бугьарамигу, хъунмурчIин бавахъул. Ттаттахъул чанну бур. Чанну бур жагьилталгу.
[dropcap]М[/dropcap]юрщи оьрчIал назмурдах вичIи дишайхту, чIалай бур хIакьину оьрчIан лакку мазрайсса, аьщуйн щуну учиннив, лакрал шаэртурал шеърирду лахьхьин бувавриха цучIав зий акъашиву: я нитти-буттахъул, я школарду. Темарду лап мискинсса дур. Лакрал оьрчIансса авадансса фольклордания ва поэзиялия хаварвагу бакъасса хханссар. Ва кIану хIисавравун лавсун, лакрал жагьилтурал ккурандалун барчаллагьри ялагу. Миннал сипталийну ва цIана нанисса конкурс кIилчинсса конкурсри.
Ларгсса шиналгу вара даражалий лахъа-хъунну хьуссия цалчинмур конкурсгу. Гьашинумур конкурсрал хIасиллу дувантIиссар февраль зурул 10-нний. Ва кьини конкурс къуртал хъанахъиссар. Ххув хьуми барча буллалисса шадлугъ хьунтIий дур Оьруснал театрданул хъунмур залдануву февраль зурул 16-нний ссят ряххунний ахттакьуннай. Ва, гьай-гьай, лакралгу, пасихIсса лакку мукъулгу байранни. Халкьуннал байранни. Лакрал лак гьаз буллалисса.
